Read gitonga Joba 21 Bible Online

Joba 21 - gitonga bible

Joba 21

¹Khavbo avbo, Joba a di hakha, khuye:

²Yingisani gwadi magana yangu, khavbo mu na khalago vatangadzisi wangu.

³Nyi digeni nyi ganele, khu hwane nya gu bani nyi vbedzide gu ganela, mwa gu dzina nyi poyileni.

⁴Gasi eni nya gu ganedzisana ni muthu, gani? Khu ginani hefemulo wangu wu ngamba vbela tshivba, na?

⁵Nyi khedzeni mu samale mu dzi phara sihofu.

⁶Kholu nya gu alakanya esi, nya gu vbela tshivba, mili wangu watshavbo wu ndrendremela.

⁷Khu ginani va nya guvivbedwa khu monyo va vbanya ngudzu, kala va gumba ni gu engedzelana gughanya?

⁸Sanana sawe sa gu khadzisega gumogo navo; kala va wona vatugulu vawe.

⁹Va gu khala khu gurula nyambana hwanga dzindrangani gwawe, nyamba vetwa khu lipitso la Nungungulu.

¹⁰Dzimombe dzawe nya vamatune dza gu lita, dza gu thela mimba, ni migadzi yakone ya gu velega, gima kha yi fedwi.

¹¹Va gu tulela sanana sawe gukhwatshi tshambi, iso nya sidugwana sa gu ndragandraga khu gutsaka.

¹²Va embelela na va gu womba dzingoma ni sitendre, va womba misengele khu gutsaka.

¹³Matshigu yawe nya guvbanye va gu khala na va tsakide, kala va dzingwa khu gurula.

¹⁴Khu guralo, va gu embela PFHUMU Nungungulu, khavo: Khuga avbo gwathu; kholu ethu kha hi vbweti guti gilo khu dzindzila dzago.

¹⁵Khu mani Pfhumu nya Tshivba Yatshavbo nya gukala hi mu khozela? Giphaso muni hi na gi manago ha gu lombelela ga Nungungulu?

¹⁶Wonani gukhenu gukatega gwawe kha guti khu mandzani gwawe, ni gualakanya gwa va nya guvivbedwa khu monyo, gomo hwindzo ni eni.

¹⁷Dzinyondro dzingani va nya guvivbedwa khu monyo va tshimegedwago khu mwenge? Dzinyondro dzingani va dugeledwago khu mhango ni gu thegedwa khu likhulo la Nungungulu?

¹⁸Dzinyondro dzingani va vbuvbiswago khu phuvbo gukhwatshi mavivi ni gukhwatshi wulelu wu vbuvbiswago khu gipupwane.

¹⁹Enu mwa gu ganelani gukhenu: “Nungungulu a gu tsayisa sanana sawe khu sighoho sa vavelegi vawe; khu kharato khu ginani a si tsayisigo avo vavelegi, gasi va mana gihevbudzo?

²⁰Gu di vbwetega va yi mana vabune tsayiso yawe. Va sela gambe gikombe nya khorodza ya Nungungulu Nya Tshivba Yatshavbo.

²¹Kholu hwane nya gufe, tengo nya matshigu yawe wa gu bani wu vbede, va na khuga mafuni momu. Ginani va yelago gu khathala gambe khigyo khu dzindranga dzawe?

²²Khu mani a na dzi kodzago gu hevbudza mapimo Nungungulu, avbo Uye a lamulago ni vakhongolo nya vathu?

²³Mumbe muthu a gufa na ngari ni tshivba, na nga khadzisegide gwadi ni gutangala nya gukhongolo.

²⁴Afa na enide gwadi mongo nya marambo yaye na wu tiyide gwadi.

²⁵Gasi mumbe a gufa gutshanisekani monyoni gwaye, nyamba tshuka na lingide gutsaka ga mafuni momu.

²⁶Vambe ni vambe va gufa gumogo vaya lala vatshavbo thowoni, va wulugedwa khu siwungu.

²⁷Wonani nya gukhenu, nyi ngu mati mapimo yanu, ni gikungo mu lugago khu eni;

²⁸kholu mwa gu ganela gukhenu; yomo hayi nyumba ya linganagana, ni tshatsha wa gighohi.

²⁹Gasi kha mwa wudzisa vavbindri nya ndzila, gani? Kha mwa khathala khiso va nga mi embelani, gani?

³⁰Nya gupwani muthu nya gighohi a ngu vbuluga litshigu nya mhango, a tsetseledwa litshigu nya likhulo la Nungungulu, gani?

³¹Khu mani a na gu wonago sighoho saye, ni gu mu ninga tsayiso khu iso a giridego?

³²Tshigu va na yiswago thowoni, gu na manega ni dzighadhi nya gu va ghadhe.

³³Gidzemo nya gingi gi na va bangaladza, khu mbeli ni hwane, ambari va gu futela mafu, kha ma na va lemela.

³⁴Khu ginani mu nyi sengago khu malipha khenu mwa gu nyi tangadzisa, nari gu magana yanu khya malipha basi.