Read gitonga Joba 24 Bible Online

Joba 24 - gitonga bible

Joba 24

¹Khu ginani Nungungulu nya Tshivba Yatshavbo a si dzi vegeli gikhati nya gulamule sighohi? Khu ginani vathu vaye va gumba ma wona matshigu yoyo?

²Vomo avo va vbindrugedzago mivbingano ya vakwawe, va ba mitshambi va khala avo vahavisi.

³Va wandra giburwana gya khulungu, noni va yi molela mombe yaye khu milandru.

⁴Va gu reda sisiwana si ndreya ndzilani, vahamugi vatshavbo va tigoni va thava vaya sihala.

⁵Kha nga dziburu nya likhabi giwulani, sisiwana sa gu wuga gu ngari dzimindru ngudzu, guya dzi vbwetela guhodza giwulani, si gu mana mafuni nya gihala, si ta ninga sanana sawe.

⁶Si roledzela nyatshwade nya sivbila marembweni, si ya roledzela nyatshwade nya dziuvha dza va nya guvivbedwa khu monyo.

⁷Vbawutshigutunu sa gu khala wumbwiri khu hamuga guambala, si hamuga ni gifenengelo nya guvhike girame.

⁸Sa gu wedwa khu dzindzadzi musigomoni, si namarela siwindri khu gu hamuga wuthavelo.

⁹Sigulungu sa gu wandrwa beleni ga vamayi vawe, va livba milandru khu sanana sa beleni nya sisiwana.

¹⁰Sa gu gimbila wumbwiri khu gu hamuga guambala si rwadziswa dzinyandra nya gulemele na si gupwa ndzala.

¹¹Sa gu gama mafura mabhiyoni ya va nya guvivbedwa khu monyo, sa vhuva wadwa musighowoloni na sa gupwa lidora.

¹²Dzihuwa dzawe dza gu pwala madhoropani, ni mihefemulo ya avo va bayisidwego, ya gu keta; aholu Nungungulu kha si woni isoso.

¹³Vomo avo va vengago wenengedzo, va si dzitigo dzindzila dzaye, ambari gu gimbila khu sindzilana saye.

¹⁴Musongi a gu wuga gu ngari dzimindru ngudzu, aya songa gisiwana ni muhamugi, vbawutshigutunu a gu khala mbafa.

¹⁵Maho nya gibhayi ma gu lirela guphuma, khigyo: “Mwalo a na nyi wonago!” A dzi siha khovbe yaye.

¹⁶Wutshigu wule, dzimbafa dza gu phanga dzindranga va dzi holeledego vbamihanitunu, gwa gugya dzi sihala.

¹⁷Ga avo, mihani kha nga mutsa nya lufu wu thavisago; kholu avo va olovede guthisa nya gidema nya wutshigu.

¹⁸Gasi enu mwari, khenu: Va nya guvivbedwa khu monyo, va gu kukulutwa khu mati nga sihagane, thomba yawe yi yuyutedwe mafuni momu; gima kha va na gandra gambe khu ndzila yiyago mahangeni gwawe.

¹⁹Kha nga lihani ni gihala si bangisago mati nya thondrwane, kharato nugo sighohi si na fuviswa khu lithowo.

²⁰Va na divadwa khu vamayi vawe, siwungu si va hodza na si tsakide; mwalo a na gu va alakanyago; vathu nya sighohi va na sigudwa khu tshinani kha nga simbo.

²¹Va gu tshamisa nyamayi nya gyumba, va si khathali khu noni.

²²Aholu, Nungungulu khu tshivba yaye, a ngu thesa va nya dzitshivba; va wuga na vari mwalo gitumbo nya guvbanye.

²³A ngu va diga va sayisega gikhatinyana na va khadzisegide; aholu maho yaye ma gu khevisela dzindzila va gimbilago khidzo.

²⁴Va gu khusedzwa gikhatinyana va bwelo khavbo, va vbwasamiswa; va theswa, va duswa nga vambe, va pidwa mihungo nga giledzu nya sivbila.

²⁵A gu bani nasiri kharato, khu mani a nyi ganedzago, khu esi nyi ganedego khuye khandri lisine?