Read gitonga Joba 28 Bible Online

Joba 28 - gitonga bible

Joba 28

¹“Lisine, hi ngu dziti gukhethu, womo wulanga gu duswago umo parata, ni umo yi nyiviligiswago umo ndralama.

²Simbi ya gu kedwa mafuni, ni sugu wa gu duswa siwindrini.

³Vathu va ngu fuvisa gidema khu guwonegela, va kela kala guetani nya mafu na va gu vbweta siwindri si si tidwigo khu vathu, si guromo vbavbatshi ngudzu.

⁴A gu tula mighodhi malangani ma si khadwigo khu vathu, avbo ni migondro nya vathu yi si gandrigo, a gira dengeledengele avbo nya ngodzi, hwindzo ni vathu.

⁵Khu vbatshani gakone nya mafu gwa gu duga guhodza, aholu khu vbavbatshi gukhwatshi gu di vbiswa khu nilo.

⁶Malanga yoyo ma na ni siwindri nya safira, gu na ni wuguvbi nya ndralama.

⁷Ndzila yakone kha yi tidwi khu lighama, ambari maho nya makoti kha ma yi woni.

⁸Sirengo nya wurena kha si gimbili khu ndzila yoyo, ambari ni dzinghala nidzo kha dzi vbindri khavbovbo.

⁹Muthu a gu vega mandza yaye vbagiwindritunu, a sigula sigomo ni mikhamba yakone.

¹⁰A gu tula mitsongo musiwindrini, maho yaye na ma gu khedza satshavbo si gu ni lisima.

¹¹A ngu sega sifefe nya mati nya mitsongo, umo ma gogago khumo, a dusa vbavbandze iso si sihadego umomo.

¹²Gasi guti gogu ga gu manegela hayini? Khu hayini hi yelago guya mana mapimo?

¹³Muthu kha liti lisima nya guti, gambe kha gu manegi tigoni nya vathu va vbanyago.

¹⁴Gueta gwari khugo: Guti gumwalo avbo gwangu; linene nilo, khilo: Gumwalo ndrani gwangu.

¹⁵Kha gu rengwi khu ndralama nya guhutwe; ambari gupima tengo waye khu parata.

¹⁶Lisima laye kha li pimaniswi ni ndralama ya Ofiri, mwendro siwindri nya lisima nya onikisi niso nya safira.

¹⁷Kha gu fananiswi ni ndralama nya gukhedzige, gambe kha gu manwi khu sombo nya ndralama yi hutidwego.

¹⁸Kha gu alakanywi gilo khu korali ni kristali; guti ni lisima gu ngu vbindra dziperola.

¹⁹Tengo waye kha wu fanani ni siwindri nya topazi sa Etiyopiya, ambari gu pimaniswa ni ndralama nya guhutwe.

²⁰Ina ka, a gu bani ari kharato, gasi guti gwa guta khu hayi, khu wevbini wulanga nya mapimo?

²¹Gu sihalede vathu vatshavbo va vbanyago, gu sihalela gambe ni sinyoni sa damboni.

²²Gueta ni gufa sari khiso: Hi di pwa basi khu dzindzeve dzathu, ndruma yakone.

²³Nungungulu basi khuye a yitigo ndzila nya guti, ni wulanga gu khalago avbo.

²⁴Kholu maho yaye ma gu wona kala mahegiso nya litigo, a gu wona satshavbo si guromo vbavbatshi nya litigo.

²⁵Gikhati a giridego tshivba nya dziphuvbo ni gu vega pimo nya mati;

²⁶gikhati a emisidego nayo nya ndzadzi ni ndzila nya gulase ni mabara,

²⁷ khigyo gikhati a wonidego guti a gu wonegisa; a wuya a gu tiyisa a gu wonisisa gwadi.

²⁸ A di embela muthu, khuye: Guthava Pfhumu Nungungulu khigyo giguga nya guti, guhambana ni silo nya guvivbe, gu mana mapimo.”