Read gitonga Joba 31 Bible Online

Joba 31 - gitonga bible

Joba 31

¹Nyi giride gidzumeledzwano ni maho yangu, gukheni nyi nga tshuki nyi dogorela gyagadzyana nya mbiri.

²Khu kharato, tshatshazelo muni muthu a wu hakhago khu ga Nungungulu na wuta khu vbatshani, mwendro thomba muni ya Mune nya Tshivba Yatshavbo, a na yi manago vbatshani?

³Ina gumbembiswa, khandri gu di emisedwa va nya gu vivbedwa khu myonyo, ni dzimhango kha dzi thegeli avo va girago guvivba, gani?

⁴Ina Uye Nungungulu kha khedzi dzindzila dzangu, ni gu sayela migondro yangu, gani?

⁵Nya gu bani nyi dzegide ndzila nya malipha, ni gu mwendro ngondro wangu wu vbiredzide guya muwudambaneni;

⁶Nungungulu a na nyi vege vbagikalotunu gi lulamidego, a na dziti gukhuye nyi mwalo nandru;

⁷migondro yangu ya gu bani yi ndreyide ndzilani, monyo wangu wa gu bani wu sengidwe khu gu navela nya maho yangu, ni gu bani nyi nyenyeziside mandza yangu khu gilo nya gukari,

⁸khu guralo, eni nyi na yale, mumbe a hodza, ni dzimbewu dza thembweni gwangu dzi na siguledwe khu mikhambani.

⁹Monyo wangu wa gu bani wu dogorede ngadza vane; ni gu bani nyi holelede nyumbani ga muakelane wangu,

¹⁰mwangadzi wangu a na khale wa mumbe mwama, ni gu a lala ni vambe vama.

¹¹Kholu khu gu gira isoso, nyi di hadza gu khala dzitshoni, gighoho nya gikhongolo, gi fanelago gulamudwa.

¹²Sighoho sesi sa gu fanana ni nilo wu vbisago, kala wu mbembisa, gu dagarela ni thomba yangu yatshavbo.

¹³Nya gu bani nyi ganedzide fanelo ya githumi gyangu nya mwama mwendro nya nyamayi, gikhati nyi nga ketsarana navo,

¹⁴nyi na kheni ginani gikhati nyi na wugedwago khu Nungungulu? Ni gikhati a na nyi wudzisago, phindrulo muni nyi na mu ningago?

¹⁵Ina Uye a nyi wumbidego ndrani ga mayi wangu khandruye saye a wumbidego avo navo, gani? Khandruye wa moyo a hi wumbidego ethu hatshavbo, gani?

¹⁶Nya gu bani nyi bombide gu ninga giphaso gisiwana, ni gu mwendro na nyi digide noni kala yi fuvila maho khu gulila;

¹⁷mwendro na nyi hodzide nyenga gipandre nya guhodza gwangu, nyi si ningi nigyo gigulungu gi hodza;

¹⁸(kholu gukhugela wudzahani wangu nyi dandriside gwadi khulungu gukhwatshi nyi babe waye, gambe gukhugela ndrani ga mayi wangu nyi sayide noni);

¹⁹mwendro gu bani nyi wonide muthu na gu tshaniseka khu wuhagadzo, ni gisiwana gi hamugago gifenengelo;

²⁰mwendro mili waye wu si nyi kategisi khu gu na nyi mu furumedzide khu dzingandzu nya mawoya nya dzinvuta dzangu

²¹mwendro gu bani nyi vetide khulungu phathani khu gupwa guseketedwa khu valamuli,

²²nya gu bani nyi giride kharato, mawogo yangu mana pilege, mwendro gu vbadzuga khu magatani gwangu.

²³Kholu nyi ngu thava gumbembiswa khu Nungungulu, eni nyi si kodzi gu ema mbeli nya wugulu waye.

²⁴ Nya gu bani nyi vegide gitumbo gyangu ga ndralama yangu, mwendro gu ganela ga ndralama yangu nya guhutwe, kheni: Uwe khuwe giseketelo gyangu;

²⁵mwendro gu dzi khusedza khu gutala nya thomba yangu, nyi nengela khu satshavbo nyi giridego khu mandza yangu;

²⁶nya gu bani nyi wonide gungangamela nya lidambo, ni gukhedziga nya ngima,

²⁷mwendro monyo wangu na wu dzumede gu sengwa khu gisihaledza, nyi khusedza mandza nyi si bhejari, nyi si ninga githawo.

²⁸Esi niso a diri sighoho si yelago gulamudwa phathani. Kholu eni nyi ghohede Nungungulu a guromo vbatshani ndzadzini.

²⁹Nya gu bani nyi nengede khu gu wona nala wangu na gu thegedwa khu libango, mwendro nyi ghiya khu gu uye na dugeledwe khu sigaradzo;

³⁰eni kha nya dzumedzisa likana langu gu ghoha khu lombelela gukheni nala wangu a nafe;

³¹avo va khalago tshatshani gwangu, va di ganela, khavo: “Khu mani a gumba khura khu nyama yaye!”

³²Vaendri va di si lali makondroni; kholu lidimba langu li di tulegide gikhati gyatshavbo gasi gu va hakha.

³³Nya gu bani nyi fananide ni vambe vathu nyi fenengedza sighoho sangu kha nga Adhamu, nyi siha milandru yangu monyoni gwangu;

³⁴nyi thedwa hwanga khu ligwaha nya gidzemo, nyi thava gu hembuludwa ni gu tsorodzedwa khu valongo, gukala nyi sega likana nyi si tiyi ni gu duga khu nyumbani.

³⁵Naripwani womo saye a nyi yingisago! Aya kha mahegiso nya gu dzi vhikela gwangu! Nungungulu nya Tshivba Yatshavbo a nyi ninge phindrulo, ni gukheni nala wangu a na sayine khu gu lova nandru nya ketso a nyi girelago!

³⁶Eni kamwe nyi di hadza gu wu vbagara magatani, nyi wu ambala hungoni kha nga gihugu.

³⁷Nyi di hadza gu mu yeyedza tengo nya mavbanyelo yangu nyi dzi gira linganagana nyi hidzimela vbafuvbi gwaye.

³⁸Lithembwe langu la gu dilela khu mahungu yangu, ni mafu yaye ma gu tala khu marongo,

³⁹nya gu bani nyi hodzide mahala mihandro yaye, nya gu bani nyi vbedzide tshivba vamune vaye,

⁴⁰nyi bugisa miba wulangani nya sivbila, ni mwasi wulangani nya mavbila. Ma guhegisa avba magana ya Joba.