Read gitonga Joba 32 Bible Online

Joba 32 - gitonga bible

Joba 32

¹Khavbo avbo, vama vale va vararu va di hegisa gu ganedzisana ni Joba, kholu uye a di dzipwa nari mwalo nandru mbeli gwawe.

²Aholu Eliyu, mwamana wa Bharakeli wa na Bhuzi, wa nyumbani ga na Ramu, a di vila khu likhulo a wugela Joba, kholu uye abune a di dzipwa na lulamide, mbeli ga Nungungulu.

³A di goroswa gambe khu dzipari dzile dza dzitharu dza Joba, kholu va ngamba kodza gu mu kona va mu rwega nandru.

⁴Eliyu a di degula gikhati a nga bani a ganela Joba, kholu uye a di gu mu vbindra khu tanga.

⁵Aholu avbo a nga wona gukhuye vama vale va vararu kha va mani magana nya gu mu phindrule, Eliyu a di vila khu likhulo.

⁶Eliyu, mwamana wa Bharakeli, wa na Bhuzi, a di khuye: “Eni nyi ngari lidzaha khu tanga, gasi enu mu vakhongolo. Khu guralo, nyi di kanakana gu mu yeyedza iso nyi sitigo.

⁷Nyi di, kheni: Va na ganele avo a gu vakhongolo khu guvelegwa, ni wungi nya myaga, khavo va yelago guhevbudza guti.

⁸Aholu lomo liphuvbo ndrani nya muthu, li mu ningago mapimo, furugedzo wa uye nya Tshivba Yatshavbo.

⁹Khandri avo va gumbidego basi, va tigo ngudzu, mwendro vagale basi, va pimago gwadi lisine.

¹⁰Khu kharato nyi ngu mi embelani, kheni: Nyi yingiseni; eni neni, nyi na mi embela iso nyi si pimago.

¹¹Avbo mu nga bani mu ganela, eni nyi di degula nyi yingisa iso mu nga bani mu nyi tshamusela; gukheni mwendro saye mu na ni magana nya wutshukwana.

¹²Nyi di gu yingisa gwadi ni gu pwisisa; gambe mwalo ni moyo wanu a manidego magana nya gukone Joba, gukhuye ghohide.

¹³Mu nga ganeli gukhenu: Hi tugude guti, kholu uye a ningago mapimo khu Nungungulu, khandri muthu.

¹⁴Kholu Joba kha ganela avbo gwangu magana yaye, gasi eni kha nyi na mi ninga phindrulo, kha nga mawonelo yanu.

¹⁵Wonani, vathu vava, va hambanegide mapimo, kha va khodzi gu mu ninga phindrulo, kha va nga mana nigyo nya guganele.

¹⁶Ina nyi ngu yela gu va lirela, nyi si ganeli, olu avo va degulago va si ganeli, gani?

¹⁷Eni neni nyi na hakha khu yangu mawonelo, gasi nyi va yeyedza iso nyi si pimago.

¹⁸Kholu mangi magana nyi gu nawo, liphuvbo li ngu nyi gurumedza gu ganela,

¹⁹kholu kanani gwangu gu ngu vila gukhwatshi wadwa nya givhayi wu pupumago, wu dzi kodzago gu pandra ambari ni sigasi nya siphya.

²⁰Nyi digeni nyi phofumula giviti gyangu; nyi tula likana langu nyi mi hakha.

²¹Kha nyi na khedza khu khovbe ya muthu, ambari guvbweta gu tsakisa muthu.

²²Kholu kha nyi vbweti gu ganela mapongowongo, Muwumbi wangu a nga vbiredzela gu nyi dusa.”