Read gitonga Joba 36 Bible Online

Joba 36 - gitonga bible

Joba 36

¹Eliyu, a di simama a ganela, khuye:

²Joba, timisela u lirele gambe vbadugwana, nyi na gu yeyedza iso u yelago gu ganela, kholu nyi ngari ni magana ma ganelago khu Nungungulu.

³Guti gwangu gwa guta khu hwindzo, nyita tshamusela gululama ga Muvangi wangu.

⁴U nga kanakani, kholu magana yangu khandri ya malipha; mbeli gwago emide uye a vbeledego ni mune nya lisine.

⁵Khedza gukhuwe Nungungulu khongolo ngudzu; gambe kha nyenyi muthu; khongolo khu tshivba nya guti.

⁶Kha tsetsi womi nya sighohi, aholu a gu vhikela dzifanelo nya sisiwana.

⁷Kha pfhurareli va nya gululama, aholu a gu va vega ni vafumeli vbagikhalotunu nya wufumu; a va khusedza kala gupindruga.

⁸Va gu bani va hungidwe khu makhetshe, ni dzingodzi nya wuvi,

⁹uye a na va yeyedza mithumo yawe ni sighoho va si giridego khu matshandza.

¹⁰A gu va tula dzindzeve gasi va yingise sihevbulo, a va ruma gu va dzi laye khu guvivba va giridego.

¹¹Va gu mu yingisa ni gu mu thumela, va na vbanya na va khadzisegide kala mahegiso nya guvbanye gwawe.

¹²Aholu va gumba yingisa, va na mbembiswa khu matshari, vafa wupumbuni.

¹³Aholu va nya guvivbedwa khu myonyo, va na wungedzela likhulo la Nungungulu, va si kodzi ni gu lomba giphaso.

¹⁴Va gufa na va ngari madzaha, womi wawe wu vbindra gufanana ni vathu nya gunyenyeze.

¹⁵Aholu Nungungulu a gu vbanyisa sisiwana gutshanisekani gwawe, na vari gutshanisekani a ngu ganela navo.

¹⁶Uwe nuwe a ngu vbweta gu gu dusa vbakari nya sigaradzo, a gu vega wulangani wu anamidego, a gu hodzisa khu guhodza nya gunone.

¹⁷Aholu uwe u tade khu maalakanyo nya sighohi, khu kharato, gulamudwa ni tsayiso si gu lindrede.

¹⁸Dzi wonele! U nga dzumeli gu sengwa khu dzithomba, dzi gu yisa gutsayiswani, u nga dzumeli gu dusa tengo nya wungi nya dzitsapawu, gasi gulivba milandru yago.

¹⁹Ina wa gu pimisa gukhuwe dzithomba dzago ni gu dzi garadza gwago gwatshavbo, gu ngu kodza gu gu vbulugisa gutshanisekani, gani?

²⁰U nga naveli gu wona wutshigu, gikhati vathu va duswago khu malangani yawe.

²¹Dzi wonele! U nga ndreyeli guvivbani, kholu khiso u si tsakelago guvbindra gu dzi nogisa.

²²Nungungulu a gu dzi khusedza khu tshivba yaye, khu mani muhevbudzi a fananago naye?

²³Khu mani a kodzago gu mu hevbudza mathumelo yaye, ni uye a kodzago gu mu kawuka, khuye: “Khu giri gwadi.”

²⁴Alakanya gu khusedza mithumo yaye, eyi yi dhumiswago khu dzindzimo khu vathu nya vangi.

²⁵Vathu vatshavbo va yi wone khu maho yawe, na yi ngari hwindzo, vathu va di tsaka khiyo.

²⁶Wona gukhuwe Nungungulu khongolo ngudzu, a ngu vbindra iso hi si pimisago, tengo nya myaga yaye a manegidego khiyo, mwalo a wu sayago.

²⁷Khuye a tshanganisago madododo nya mati mapfhini, gasi ma wisa ndzadzi.

²⁸Mapfhi ma gu vbaladza ndzadzi, yiwa khu gutala vbatshani ga vathu nya vangi.

²⁹Khu mani a pimago idzo Pfhumu a ladzago khidzo mapfhi, ni idzo a dzumisago khidzo mabara khu tshatshani gwaye?

³⁰Wona idzo a rinyago khidzo gulasa mapfhini, a wenengedza gueta nya linene.

³¹Khidzo kharati a fumelago khidzo mayigo yatshavbo, a ma ninga guhodza nya gutale.

³²A ngu fumbaredza nyangafula khu mandzani gwaye, a yi rumela guya veta wulanga a wu vbwetago gukhuye yi vete.

³³Libara laye la gu tivisa gingulu na gi ngari ndzilani, ni mitshambi niyo yi ngu muti a gu bani na guta.