Read gitonga Joba 42 Bible Online

Joba 42 - gitonga bible

Joba 42

¹Joba a di phindrula PFHUMU Nungungulu, khuye:

²“Nyi ngu dziti gwadi gukheni khu padwi khu gilo, ni gimwegyo nya makungo yago kha gi thindrekiswi.

³ U di khuwe: Khu mani wule a bombago gulaya gwangu nari mwalo wugengeli? Khu guralo, nyi ganede iso nyi nga bani nyi si si pimi; silo nya gusamadzise nyi nga bani nyi si si pimi.

⁴ Olu nyi ngu gu lomba, U nyi yingisa nyi ganela, somo nyi vbwetago gu wudzisa, gasi Uwe U nyi hevbudze.

⁵Nyi di gupwa basi khu dzindzeve, gasi olu nyi ngu gu wona khu maho yangu.

⁶Khu guralo, nyi ngu dzipwa na nyiri ni nandru, olu nyi ngu dzi laya, khu guphorola nguma ni kudzudzwane.”

⁷Avbo PFHUMU Nungungulu a vbedzidego gu embela magana yaya Joba, PFHUMU Nungungulu a di embela gambe Elifazi, Mutemane, khuye: “Likhulo langu li khondrede uwe gumogo ni dzipari dzago dza dzimbili; kholu kha mwa ganelani silo nya gululame avbo gwangu, kha nga githumi gyangu Joba.

⁸Khu guralo, dzegani livbandre na dzimbili dzikuzi nya dzimombe, ni livbandre na dzimbili dzihamba, mu hongola nadzo ga githumi gyangu Joba, mu ya gira khidzo phaselo nya guvbiswe. Githumi gyangu Joba gi na mi lombelelani eni nyi na hakha khavbo gwaye nombelo wanu. Gasi khu guralo, kha nyi na mi tsayisa ambari olu mu ngamba gira silo nya gululame avbo gwangu, mu si fanani ni githumi gyangu Joba.”

⁹Khavbo avbo, Elifazi, Mutemane, ni Bhilidhadhi, Musuwa, ni Zofari, Munahami, va di gira kha nga idzo va nga rumwago khidzo khu PFHUMU Nungungulu; ni PFHUMU Nungungulu a di yingisa nombelo wa Joba.

¹⁰ Khavbo avbo, PFHUMU Nungungulu a di tshudzisa Joba, gikhati uye a nga bani a gu lombelela khu dzipari dzaye; PFHUMU Nungungulu a di mu bweledzela khu nyondro mbili ga satshavbo esi a nga bani nari naso.

¹¹Khu hwane nya ugo, vatshavbo vandriyaye nya vama ni vanyamayi ni vatshavbo avo va nga bani va muti khu gale, va dita va ta hodza naye ndrangani gwaye, va mu tangadzisa va mu bavbula marongo khu kotani nya libango a nga bani a resedwe khu PFHUMU Nungungulu vbatshani gwaye; muthu ni muthu a di mu ninga dzitsapawu ni phera nya ndralama.

¹²Khu guralo, PFHUMU Nungungulu, a di kategisa Joba a mu ninga thomba guvbindra iyo a nga bani nari nayo guhegulani; kholu a di manega nari ni likhumi na mana magumi mazana (14.000) dzinvuta, livbandre na limwedo magumi mazana (6.000) dzingameriya, likhumi mazana (1.000) mipatwa nya dzimombe ni likhumi mazana (1.000) dziburu.

¹³A mana gambe simbe livbandre na sivili sanana nya sikhwathana ni vanyamahegyane vararu.

¹⁴Uye nya guphele a di mu riya lina la Jemima, la mumbe khuye, khu Keziya, nya wuraru, khuye, khu Khereni-Hapuki.

¹⁵Tigoni mule gwatshavbo gu diri mwalo vanyamayi nya wumburi nya gufanana ni vanyamahegyane va Joba; babe wawe a di va kabanisa thomba gumogo ni vandriyawe nya sikhwathana.

¹⁶Khu hwane nya ugo, Joba vbanyide lizana ni magumana myaga; a wona sanana saye ni sanana sa sanana saye, kala gitugulwana nya wu na.

¹⁷Khavbo avbo, Joba a difa, na gumbide, nari ni matshigu nya gutale ngudzu.