Read gitonga Joba 5 Bible Online

Joba 5 - gitonga bible

Joba 5

¹“Olu wa gu dzina lombelela! A gu dzina saye womo a na gu hakhago?” Ina mwalo nya guage mwendro ngilozi yi nata gu phasago, gani?

²Gipumbu gi nafa khu giviti gyaye, ni ngara a na mbemba khu gumbana mapimo.

³Nyi wonide gipumbu na gi gu nava mikhamba; khu gikhati gidugwana nyi di vala nyumba yaye.

⁴Sanana sawe mwalo a si vhikelago, sa gu gandredzedwa dzinyangwani nya miphatha, nyamba emedwa khu muthu.

⁵Mihandro yawe va gu hodzedwa khavo va pwago ndzala, ambari na va yi bhiyide khu miba; muphangi a gu phanga thomba yawe.

⁶Kholu gutshaniseka kha gu dugi khumo nya kudzudzwane, ambari sigaradzo kha si bugi khu mafuni.

⁷Aholu muthu velegedwe sigaradzo, kha nga dzitshahe dzi pirigago niloni dzi vbuvba dziya vbatshani.

⁸Aholu eni, nyi na vbweta Nungungulu, nyi bikela gwaye sigaradzo sangu.

⁹Uye giride silo nya sikhongolo si samadzisago, ni siliwugiso nyambana tengo.

¹⁰Khuye a wisago ndzadzi mafuni, ni gu gogisa mati mahangeni;

¹¹a ngu khusedza avo va dzi nogisago, ni gu wuyisa avo va lilago, wulangani nya gukhadzisege.

¹²Uye a ngu Pfhungumula makungo ya va nya mano, gasi mandza yawe ma si dugeleli ga makungo yawe.

¹³ A gu mola va nya gugengela khu mano yawe, a phalalegisa makungo ya va nya guvivbedwa khu monyo khu guvbiredza.

¹⁴Va gu pfoledwa khu lidambo gu ngari mihani; va gimbila na va gu phiphithela gukhwatshi wutshigu.

¹⁵Uye a ngu vbulugisa gisiwana gu paywa khu litshari li dugago khu maganani gwawe, ni gu gi vhikela mandzani ga va nya tshivba.

¹⁶Khu guralo, sisiwana si na ni gitumbo, gasi va nya guvivbedwa khu monyo, va ngu segwa magana.

¹⁷ Wonani, idzo a kategago khidzo wule a dzumelago gu kawukwa khu Nungungulu; khu kharato u nga yeyisi tsayiso wa Nungungulu nya Tshivba Yatshavbo.

¹⁸ Kholu uye a ngu thela dzimbanga, bwelo khavbo a dzi hungelela; Uye a ngu bayisa, aholu mandza yaye ma vbodzisa.

¹⁹Ambari wa gu dugeledwa khu livbandre na mweyo dzimhango, uye a na gu vbulugisa, guvivba ga iyo nya livbandre na dzimbili, kha gu na nga gutshanisa.

²⁰Gikhatini nya ndzala, kha na gu diga ufa, a na gu tshudzisa nyimbini, ni tshivbani nya matshari.

²¹A na gu siha ga tshanisa nya lidimi, ambari gwa gu vboha gusasedwa, uwe u nga khali hwanga.

²²Dza gu dugelela dzimhango ni ndzala uwe u na hega, ni sirengo nya likhabi, kha si na gu thela hwanga.

²³Kholu u na gira gidzumeledzwano ni siwindri sa khabini, ni sirengo nya likhabi, u na vbanya naso khu gurula.

²⁴U na khalega gwadi tshatshani gwago, wa gu holelela mavbandroni gwago, kha gu na kiyela gilo.

²⁵Gambe u na wona livelego lago li andra, vatugulu vago va fanana ni mwasi wa mafuni.

²⁶U na dzingwa thowoni nu ngari ni tshivba, u fanana ni mavbila ma vbwerwago na ma vidzidwe.

²⁷“Hi khedzide gwadi isoso, hi si wona nari sadi. Khu guralo, yingisa u si pimisa, gasi si khale monyoni gwago.”