Read gitonga Joba 7 Bible Online

Joba 7 - gitonga bible

Joba 7

¹“Ina gikhati nya guvbanye ga muthu mafuni momu khandri a gu dwana, gani? Matshigu yaye kha ma fanani ni ya muthu a thodwego, gani?

²Kha nga khumbi yi vbiswago khu lihani yi vbweta mutsa, ni githumi gi khedziselago litshigu nya guhakhiswe gwaye.

³Khu kharato, nyi ningidwe migima nya sigaradzo, ni wutshigu nya wuvi kha nga thomba yangu.

⁴Nya gu lala, nya gu ganela, kheni: Nyi na wuga lini? Wutshigu wakone wu laphide ngudzu, nyi garade khu gu dzi vbindrugedzela vbadawutunu kala gugya.

⁵Mili wangu wu tade khu ndzilo ni siwungu, lidowo langu li tade khu silondra ni wusila.

⁶Matshigu yangu ma gu vbindra khu guvbiredza gukhwatshi gikari gya mulugi, ma mwalalega nyambana gitumbo.

⁷Alakanya gukhuwe womi wangu furugedzo nya phuvbo, maho yangu kha ma lireli gambe gu wona gutsaka.

⁸Maho ya vale va nyi wonago olu, gima kha ma na nyi wona gambe; Maho yago ma na ronegela gu nyi wona, aholu, gima kha ma na nyi wona gambe.

⁹Nya nga mapfhi ma phalalegago ma mwalalega, kharato nugo wule a relelago phalani nya vafi, gima kha wuyi gambe.

¹⁰Gima kha na wuya gambe a ta wona gaya gwaye, ni nyumba yaye gima kha yi na muti gambe.

¹¹Khu guralo, kha nyi na kodza gu degula khu guvbisega nya monyo wangu, nyi na dusa iso si nyi vbisago hefemuloni gwangu.

¹²Olu u nyi tshikelago dzindzila dzangu khu maphuvbo yatshavbo, ina nya nyova linene mwendro nyatudwi wa nondrwani, gani?

¹³Avbo nyi lingago gulala dawuni kheni mwendro ligovbeni nyi na mana gutangala, gasi nyi fela guvbindrisa sigaradzo;

¹⁴uwe wa gu nyi thusedzela khu dzindroro u nyi thurugisa khu siwoniso.

¹⁵Gudiri tshukwana gu gamwa nyifa, guvbindra gutshaniseka kharati nyi tshalago khu sikongolo basi.

¹⁶Nyi garade. Kha nyi nga gu khathala gambe khu womi wangu, kholu kha nyi na vbanya kala gupindruga. Nyi dige basi nyifa, kholu matshigu yangu ma vbede.

¹⁷ Gasi muthu ginani nya gukala u dzi garadza ni gu khathala khuye,

¹⁸u mu wuselago gugya ni gugya, bwelo khavbo u mu linga ni gevbini gikhati?

¹⁹U na nyi ronogela kala lini? U na nyi ninga lini gikhati nya gu midze dzindrura, na?

²⁰Nya gu bani nyi ghohide, gasi gihoso muni nyi gu giredego, uwe u wonelelago vathu? Khu ginani u nyi hekhago khu sighalala sago, gasi nyi khade rwalo nya gulemele avbo gwago, gani?

²¹Khu ginani u si nyi pweligo sihoso sangu ni gu futa sighoho sangu, na? Kholu nyi na dzegela gulala ngumani, u nyi vbweta u si nyi mani gambe.”