Read gitonga Joba 9 Bible Online

Joba 9 - gitonga bible

Joba 9

¹Khavbo avbo, Joba a di hakha a ganela, khuye:

² “Ina, nyi ngu dziti gukheni isoso lisine: Muthu a ngu dzi kodza kharini gululama mbeli gwa Nungungulu.

³Ambari a gu zama gu ganedzisana Naye, gima kha na mana phindrulo nya gimwegyo basi nya likhumi mazana (1.000) siwudziso a na gu mu wudzisago.

⁴Uye a na ni monyo nya guti, ni tshivba yaye yikhongolo ngudzu, khu mani a lingidego gu dwana Naye a dugelela?

⁵Uye khuye a sigulago sigomo iso si si dziti, a si wumbulutela si thega khu likhulo laye.

⁶Uye a gu vbevbera mafu a ma dusa malangani gwaye, a ndrendremedzisa ni madingo yakone.

⁷Uye a ganelago ni lidambo khuye li nga dugi, li mu yingisa; a sega ni dzinyeledzi dzi si wonegi.

⁸ Khuye ekha a ghwimbidego damboni, a gimbila khu vbatshani nya linene.

⁹ Khuye a wumbidego dzithandra nya vamasase nya gugye, ni dzinyeledzi dzatshavbo dza Marandzi.

¹⁰Khuye a giridego silo nya sikhongolo, vathu va si kodzigo gu si pima, a gira ni siliwugiso nya gusamadzise tengo wakone wu gumba kodzwa gu saywa.

¹¹A guvbindra khu vbafuvbi gwangu, nyi si mu woni. A ndreya khu vbafuvbi gwangu, nyi si mupwi.

¹²A gu vbweta gu dzega gilogyo, khu mani a mu himbedzelago? Khu mani a na gu tiya gu mu wudzisa, khuye: Ginani u girago?

¹³Nungungulu kha na bosa likhulo laye, ni vaphasedzeli va Egipito va na dzi nogisa mbeli gwaye.

¹⁴Nyi na dzi kodza kharini gu phikizana naye, nyi na ma mana hayi magana nya gu mu phindrule khayo?

¹⁵Ambari na nyiri mwalo nandru, kha nyi dzi kodzi gu mu ninga phindrulo; nyi na lomba wuhindzi gwaye, kholu uye khuye mulamuli wangu.

¹⁶Ambari nya gu mu rana a nyi hakha, kha nyi khodwi gukheni a yingiside lito langu.

¹⁷Kholu Uye a di hadza gu nyi pferulela khu gipupwane, a engedzela dzimbanga dzangu, na nyiri mwalo nandru.

¹⁸Kha nyi ningi gikhati nya guhefemule, aholu a gu nyi khurisa khu wuvi.

¹⁹A gu bani ari khu mahungu nya tshivba, Uye khuye mune nya tshivba, khu mani a na gu mu konago phathani?

²⁰Ambari nya sa ghoha, magana yangu ma ngu nyi kona, nya gukheni nyi lulamide, Uye a na nyi rwega nandru.

²¹Ambari na nyi lulamide, kha nyi khathali khu wurumba wangu, nyi garade khu gu vbanya.

²²Avbo gwangu, satshavbo si ngu fanana; khu kharato, nyi ngu ganela, kheni: Uye a ngu tsayisa muthu nya gululame nuye nyamba lulama.

²³Gwa gu tshuka gu dugelela tungu wu songa khu githugedza; Uye Pfhumu a na hega khu gu tshaniseka ga vale va gu mwalo nandru.

²⁴Litigo la gu ningedwa mandzani nya sighohi, Uye a gu sega maho ya valamuli vaye, a gu bani nasiri uye, gasi khu mani a girago?

²⁵Matshigu yangu ma gu tutuma guvbindra avo va palisanago, ma gu vbindra ma si gu woni gutsaka.

²⁶Ma gu mwalalega kha nga gitataru nya gugirwe khu madadanga; ma fanana ni lighama li milelago pfimba.

²⁷Nya gu ganela, kheni: Nyi na divaledwa khu gu saniseka gwangu, nyi dusa guthuviga khovbeni gwangu, nyi wuya nyi tangala khu gutsaka.

²⁸Nyi ngu engedza gupwa wuvi khu gu saniseka gwangu; kholu nyi ngu dziti gukheni khu nyi woni na nyiri mwalo nandru.

²⁹Olu nyi lamudwego nyi rwegwa nandru, nyi na dzi garadzela gambe ginani gu thumela mahala?

³⁰Ambari nya gu hamba khu mati nya thondrwane, nyi hamba mandza yangu ma aga khu sabawu,

³¹Nungungulu a na nyi dzudzuga maragani, dzingandzu dzangu dzi na nyi nyenyeza khu ndzilo.

³²Kholu Uye khandri muthu kha nga eni, nya guketsarane naye phathani, nyi ya lamudwa naye.

³³Mwalo vbakari gwathu, a yelago gu hi tshanganisa eni Naye, a khala uye mulamuli wathu.

³⁴A na duse hwamboni gwangu ndronga yaye, gasi nyi si ndrendremeli khu guthusedzela gwaye;

³⁵khu guralo, nyi na ganela naye nyambana hwanga, kholu nyi ngu khodwa gukheni nyi mwalo nandru.”