Read gitonga Dzindzimo 104 Bible Online

Dzindzimo 104 - gitonga bible

Dzindzimo 104

¹Uwe hefemulo wangu, bonga PFHUMU Nungungulu! PFHUMU Nungungulu wangu, u khongolo ngudzu! U ambade gungangamela ni wugulu!

²U ambade wenengedzo kha nga gifenengelo, u gu ladza ndzadzini gu fanana ni lilwambi.

³U vbahide dzinyumba dzago matini ya vbatshani, u giride kareta yago khu mapfhi, u gimbila dzimbapini nya phuvbo.

⁴ Wa gu gira dziphuvbo dzi khala dzingilozi dzago ni malavbelavbe nya nilo ma khala sithumi sago.

⁵U tiyiside litigo khu madingo nya gutiye, gima kha li na nga khuyuga gambe.

⁶U fenengedzide litigo khu linene khwatshi mwendra, mati ma di gu ema vbatshani nya sigomo.

⁷Aholu, khu gu ma kawuka gwago, ma di tutuma, ma di thuruga ma thava khu gupwa gudzuma nya lito lago.

⁸Sigomo si di khugega, gu kembega mikova, kala malangani, u si emisedego gu khala avbo.

⁹U vegide vbingano gukhuwe mati ma nga wu vbindri, ayo gima kha ma na wuya ma fenengedza gambe litigo.

¹⁰U pode sifefe nya mati mikovani, gu khulunga mitsongo vbakari nya sigomo.

¹¹Sirengo satshavbo nya likhabi sa gu sela umo; ni dziburu nya likhabi dza gu tshima umo lidora.

¹²Bambe nya mitsongo, sinyoni sa ndzadzini sa gu vbaha sihaga sawe, si embelela matamoni nya misimbo yakone.

¹³Khu nyumbani gwago, u ngu rumela dzindzadzi dzi naganisa sigomo, u khurisa litigo khu mihandro nya makategwa yago.

¹⁴U ngu dandrisa mwasi nya guhodzwe khu sirengo, ni mitongwe nya guhodzisele vathu, gasi va kodza gu mana guhodza marembweni gwawe.

¹⁵Mafu ma ngu ninga vbinyu yi tsakisago myonyoni nya vathu, mafura ma nyelugisago dzikhovbe, ni guhodza gu wusedzago tshivba.

¹⁶Misimbo ya PFHUMU Nungungulu yi khuride, misimbo nya sedhari ya Libhanoni a nga yalago PFHUMU Nungungulu,

¹⁷sinyoni sa ndzadzini sa gu gira umo sihaga sawe, va nya mangondrongondrwane va gu vbaha dzinyumba dzawe mindzirini.

¹⁸Sigomo nya gulaphe, wuthavelo nya dziphongo nya likhabi, sihulo sa gu thavela dziphagoni nya siwindri.

¹⁹U giride ngima gasi gu kabanisa dzinango, lidambo li ngu giti gikhati li pfolago khigyo.

²⁰Gwa gu gira wutshigu gwa gu khala gidema, sirengo satshavbo nya likhabi sa gu duga si handra.

²¹Singhalana sa gu ngurangura si sota sirengo nya pfimba, sa gu lomba gu hodziswa khu Nungungulu.

²²Aholu, gikhati li dugago lidambo iso sa gu bwelela, si ya lala mavbalani gwawe.

²³Khavbo a dugago muthu a hongola mithumoni gwaye, aya thuma mihani yatshavbo kala silambo.

²⁴Uwe PFHUMU Nungungulu sigiro sago si tade! U si giride satshavbo khu guti ni mapimo, litigo li tade khu sigiro sago.

²⁵Nga wona linene nya likhongolo nya guaname, gu vbanyago umo sivangwa nya singi nyambana tengo; sirengo nya sikhongolo nesi nya sidugwane.

²⁶ Gwa gu gimbila umo mataro, ni nyoga nya yikhongolo levhiyatani u yi giridego yi khala umo.

²⁷Sivangwa satshavbo sa gu virela uwe, gu si ninga guhodza khu gikhati gi fanedego.

²⁸Khuwe u si ningago guhodza iso si rolela; wa gu tula mandza yago, iso sa gu hodza si khura.

²⁹Wa gu si sihela khovbe yago, iso sa gu vbela tshivba; wa gu si dzegela hefemulo, iso sa gufa, si bwelela si khala gambe kudzudzwane.

³⁰Wa gu rumela liphuvbo lago, sa gu wuya si vbanya, u wusedza kharati khovbe nya litigo yi khala yiphya.

³¹Wudhumo wa PFHUMU Nungungulu, khwa gu kala gupindruga! Pfhumu a na nengele khu mithumo yaye.

³²A gu khedza litigo ilo la gu ndrendremela; a gu kuha sigomo, iso sa gu tuviga wutshi.

³³Nyi na embelela ga PFHUMU Nungungulu na nyi nga gu vbanya, nyi dhumisa PFHUMU Nungungulu wangu na nyi ngari mafuni.

³⁴Gupimisa gwangu gu na tsakise Uye, eni nyi na nengela ga PFHUMU Nungungulu.

³⁵Sighohi si na fuviswe mafuni momu, ni va nya guvivba va nga manegi gambe, Uwe hefemulo wangu bonga PFHUMU Nungungulu. Bongani PFHUMU Nungungulu.