Read gitonga Dzindzimo 106 Bible Online

Dzindzimo 106 - gitonga bible

Dzindzimo 106

¹ Dhumisani PFHUMU Nungungulu! Bongani PFHUMU Nungungulu, kholu khwadi, kholu lihaladzo laye khya gupindruga.

²Khu mani a na tshamuselago mithumo ya tshivba ya PFHUMU Nungungulu? Khu mani a na pwadzago wuzundzo waye watshavbo?

³Va kategide avo va landrisago milayo yaye, va girago esi si lulamidego gikhati gyatshavbo.

⁴Alakanya, PFHUMU Nungungulu khu lihaladzo nya vathu vago, delu U nyi resela guvbanyisa gwago.

⁵Nyi gire nyi wona guandra ga vathu vago, nyi hengela makategwa nya litigo lago, gutsakani ga vale va lumbago uwe.

⁶Ethu hi ghohide gu fanana ni vababe vathu; hi giride esi nya gunyenyeze ni guvivba.

⁷ Vababe vathu gikhati va nga bani vari tigoni ga Egipito; kha va thela kota khu siliwugiso sago, kha va alakanya lihaladzo lago nya likhongolo, gambe va gu wugede vbafuvbi ni Yiphwa, a gu Yiphwa nya Gufuvile.

⁸Ambari ulo a di va vbanyisa khu kotani nya gisambanyo gyaye, afela gu wonegisa tshivba nya wugulu waye.

⁹A di kawuka Yiphwa nya Gufuvile mavbwa mati, a va thangela guetani nya nondrwa, gukhwatshi va gu gimbila giwulani nyambana mati.

¹⁰A di va vbanyisa kharati ga valala vawe, a va tshula mandzani ga vale va va vengago.

¹¹Mati ma di khubhunyeta valala vawe, va mbemba vatshavbo nyamba tshala ni moyo basi.

¹² Khavbo va nga khodwa ga situmbiso sa Nungungulu, va embelela dzindzimo nya gu mu dhumise.

¹³Aholu kha va hwela gu divala sigiro saye, kha va virela gu wona mahegiso nya gisambanyo gyaye.

¹⁴Vari giwulani va di sengwa khu gunavela nya guvivbe, va linga Nungungulu.

¹⁵ Nungungulu a di va ninga esi va nga lomba, aholu a di va tsayisa khu ngumbe nya gusonge.

¹⁶Vari mitshatshani va di girela lidiwo Mosi, ni Aroni, gihathwa nya gukatege gya PFHUMU Nungungulu.

¹⁷Mafu ma di tulega ma midza Dhatani, Abhiramo ni ngamo yaye va di midzwa navo.

¹⁸ Wu di tshiga nilo vbakari nya valandreli vawe, wu gu vbisa vathu vale vatshavbo nya guvivbe.

¹⁹Gigomoni gya Horebhi, va di wumba gimombyana nya gugirwe khu ndralama, va gu khidzimela gifananiso nya gugirwe khu simbi nya gunyiviligiswe.

²⁰Va di diga Nungungulu wawe nya wuzundzo, va gu khozela gifananiso nya girengo nya guhodze mwasi.

²¹Avo va di divala Nungungulu, Muvbanyisi wawe, a nga va girela sisamadziso tigoni ga Egipito.

²²Giride siliwugiso nya sikhongolo tigoni ga Kami, ni silo nya guthise Yiphwani nya Gufuvile.

²³ Nungungulu a di khuye a na mbembisa va na Israyeli; Mosi, githumi gyaye nya gigodwa, a di ema mbeli ga Nungungulu a lombelela gasi gu bosisa likhulo laye.

²⁴Gambe va di nyenya litigo nya gumbure ngudzu, kholu kha va khodwa ga situmbiso a nga girago.

²⁵Va di khala mitshatshani gwawe va phela gu ngurangura, va bomba gu yingisa lito la PFHUMU Nungungulu.

²⁶ Khu guralo, a di khusa mandza a sambanya, khuye: A na va gira vafa giwulani;

²⁷ a na phalalegisa sanana sawe vbakari ga va nya mayigo, a va ningela vafa mandzani ga valombo.

²⁸Va di khozela gambe nungungulu nya gupwani khu Bhahali-Peyori, va hodza dzimhamba dza vanungungulu nya gufe.

²⁹Va di gorosa Nungungulu khu mithumo yawe nya guvivbe; gu di manega tungu vbakari gwawe.

³⁰Aholu Fineya a di khuga a tsayisa avo va nga ghoha, tungu wu di vbela.

³¹ Khu kharato uye khade muthu nya gululame, a na ranwa kharato uye ni situgulwana saye kala gupindruga.

³²Va di gorosa gambe Nungungulu matini ya Meribha, Mosi a di mana libango khu kotani yawe.

³³ Kholu va di mu vbisisa monyo waye, a kala a ganela esi nyamba yela.

³⁴Kha va mbembisa mayigo, kha nga edzi PFHUMU Nungungulu a nga va rumago khidzo gu ma mbembisa.

³⁵Aholu va di ya dzi pata gumogo ni va nya mayigo, va gu hevbulela tumbunugo wawe.

³⁶ Va di khozela sifananiso sa va nya mayigo, va mbembiswa khu kotani nya isoso.

³⁷ Kholu va di songa sanana sawe nya sikhwathana, niso nya sagadzyana, va phasela khiso madhimoni.

³⁸ Va vbaladzide milovba nya vathu nyambana nandru, novba nya sanana sawe nya vama ni vanyamayi, va phasela vanungungulu Vakhanani, ni litigo li di nyenyeziswa khu novba wawe.

³⁹Khu isoso avo navo va dzi nyenyeziside wurumba wawe, khu mithumo yawe yatshavbo nya guvivbe.

⁴⁰Likhulo la PFHUMU Nungungulu li di khondra ga vathu vaye, a va tsukula, vathu va gu thomba yaye.

⁴¹A di va ningela mandzani ga va nya mayigo; gasi va fumedwa khu vale va va vengago.

⁴²Valala vawe va di va tshanisa, va gu va gira dzikhumbi dzawe.

⁴³A va vbanyiside dzinyondro nya dzingi, aholu, avo va di hambana ni dzindzila dzaye, va engedzela gu siga maragani nya guvivbe gwawe.

⁴⁴Aholu, gikhati va nga lila, Nungungulu a di vapwa, ata va phasa musigaradzoni gwawe.

⁴⁵A di alakanya gidzumeledzwano a nga gira navo, a va pwela wusiwana khu wuhindzi waye nya wungi.

⁴⁶ Khu kotani nya isoso a di kuha myonyo ya vale va nga vbagela va na Israyeli, va phela gu va pwela wusiwana.

⁴⁷Uwe PFHUMU Nungungulu wathu, hi vbanyise, hi tshanganise U hi dusa vbakari ga va nya mayigo, gasi hi kodze gu rungudza lina lago nya gukatege, hi gu dhumisa na hi tsakide.

⁴⁸ A na rungudzwe PFHUMU Nungungulu wa Israyeli, olu kala gupindruga, vathu vatshavbo va na ganele, khavo: “Ameni!” Dhumisani PFHUMU Nungungulu!