Read gitonga Dzindzimo 109 Bible Online

Dzindzimo 109 - gitonga bible

Dzindzimo 109

¹Ga muthangeli nya tsawa nya vaembeleli. Ndzimo ya Dhavhidhe Uwe Nungungulu, nyi gu dhumisago, U nga nyi deguleli!

²Kholu vathu nya guvivbe ni malipha, va ngu nyi wugela va nyi singedza malipha.

³Avo va nyi randrede khu magana yawe nya livengo, va nyi dwanisa nyambana nandru.

⁴Va gu nyi bweledzela lihaladzo langu khu livengo, aholu eni nyi ngu gira nombelo.

⁵Va gu nyi bweledzela wuwadi khu guvivba, va bweledzela lihaladzo langu khu livengo.

⁶Hatha mulamuli nyambasi wadi a lamula nala wangu. Sathane a na khale khu nyamudye gwaye.

⁷A na thuledzwe a ningwa nandru khu nala waye, a lamudwa a konega, ni nombelo waye wu na vbindrugedze wu khala giwono.

⁸ A na vbanye matshigwana madugwana, dzithomba dzaye dzi na hodzwe khu nombo.

⁹Sanana saye si na khale dzikhulungu, ni mwangadzi waye a na khale noni.

¹⁰Sanana saye si na legalege si lomba zomola, va na tutumiswe va pengela hwindzo nya marumbi yawe va vbanyago umo.

¹¹Va na dzege silo sawe satshavbo va livba khiso mangava yawe, valombo va na phange mihandro nya thumo wawe.

¹²A nga manegi ni moyo nya gu mu pwele wuhindzi, ambari wa gu pwela wusiwana sanana saye.

¹³Livelego laye latshavbo li na vbele hilo bhi, ni lina laye li na futwe ga situgulwana si nga gutago.

¹⁴PFHUMU Nungungulu a na alakanye guvivba ga nyehe waye, mayi waye a nga tsetseledwi siwono saye.

¹⁵Guvivba nya siwono sawe gu na wonege mbeli ga PFHUMU Nungungulu, aholu Nungungulu a na fuvise lihundzu laye mafuni.

¹⁶Kholu oyu muthu kha alakanya gu pwela wusiwana, aholu a di sanisa sisiwana ni va nya gu hamuga. A landrelela va nya gu vbela tshivba a va songa.

¹⁷Uye a di gu gola gu vala vathu vakwawe, olu givalo nya vathu gi na mu thegele uye; a di si goli gu kategisa, olu gima a nga kategiswi.

¹⁸A di ambala guvala gukhwatshi ngandzu, guvala gwaye gu na bele mahembeni gwaye kha nga mati, gu naganisa marambo yaye khwatshi mafura.

¹⁹Guvala gwaye gu na mu fenengedze gukhwatshi guambala, gu mu hunga gukhwatshi libhandri a hungago gikhati gyatshavbo.

²⁰PFHUMU Nungungulu a na livbe kharati valala vangu, ni vatshavbo va ganelago guvivba khu eni.

²¹Aholu, uwe PFHUMU Nungungulu nyi emele u nyi vbulugisa khu kotani nya lina lago, nyi vbanyise khu wuhindzi ni lihaladzo lago.

²²Kholu nyi tade khu wusiwana ni sigaradzo, ni monyo wangu wu ngu vbisega ngudzu ndrani gwangu.

²³Nya guya na nyi gu vbela gukhwatshi mwedzi gupfolani nya lidambo; phuvbo ya gu nyi pengisa gukhwatshi nyi khaba.

²⁴Khu guhala, dzi rerekide dzikhungumudzi dzangu, nyi wondride ngudzu khu gumbana guhodza.

²⁵ Va gu nyi wona va gu nyi hega; va ziviza va kutsunga mihungo.

²⁶Nyi phase, PFHUMU Nungungulu wangu! Nyi vbanyise khu lihaladzo lago.

²⁷Gasi va dziti, PFHUMU Nungungulu, gukhavo khuwe u giridego esi khu mandza yago.

²⁸Kha nyi khathali nya gu vadwa khu avo, nya gikhongolo khu gu kategiswa khu uwe; valala vangu va na thedwe dzitshoni, gasi eni githumi gyago nyi na nengele.

²⁹Avo va nyi nyenyago va na tale khu dzitshoni, dzitshoni dzawe dzi na va fenengedze kha nga guambala.

³⁰Nyi na emba nyamba garala nyi bonga PFHUMU Nungungulu; nyi na mu rungudza vbakari nya vathu nya vangi,

³¹kholu uye a ngu emela gisiwana, a gi vbulugisa ga avo va vbwetago gu gi songa.