Read gitonga Dzindzimo 113 Bible Online

Dzindzimo 113 - gitonga bible

Dzindzimo 113

¹Aleluya! Dhumisani PFHUMU Nungungulu! Dhumisani PFHUMU Nungungulu, enu sithumi saye; dhumisani lina la PFHUMU Nungungulu.

²Li na rungudzwe lina la PFHUMU Nungungulu, olu ni gikhati gyatshavbo.

³A na dhumiswe PFHUMU Nungungulu gukhugela Khugadambo kala Muhwadambo.

⁴PFHUMU Nungungulu khugegide vbatshani nya mayigo yatshavbo, ni wudhumo waye womo vbatshani guvbindra ndzadzini.

⁵Khu mani a fananago ni PFHUMU Nungungulu wathu, gikhalo gyaye nya wufumu gyomo vbatshani ngudzu;

⁶khu vbatshani a ngu noga a khedzisa, gasi gu wona iso si guromo ndzadzini ni mafuni.

⁷A ngu phasa gisiwana gu duga wumbwani, a khusa vbatatuni nya nguma, oyu a hamugago,

⁸gasi gu mu khadzisa ni vafumeli, vbakari nya vafumeli nya vathu vaye;

⁹a ngu gira nyamayi nya gifule a vbanya pangoni khu gukhadzisega, a mu gira mayi nya wuzundzo nya sanana. Aleluya! A na dhumiswe PFHUMU Nungungulu!