Read gitonga Dzindzimo 115 Bible Online

Dzindzimo 115 - gitonga bible

Dzindzimo 115

¹U nga zundzi ethu, PFHUMU Nungungulu, u nga zundzi ethu, aholu dhumisa lina lago, khu kotani nya lihaladzo lago, ni gutumbega gwago.

²Khu ginani va nya mayigo va na simamago gu wudzisa, khavo: “Womo hayi Nungungulu wanu?”

³Nungungulu wathu womo ndzadzini a ngu gira silo satshavbo khu gugola gwaye.

⁴Sifananiso sawe khu ndralama ni parata, thumo nya mandza nya vathu.

⁵Si na ni likana aholu kha si ganeli; ni maho si nawo, aholu kha si woni;

⁶Si na ni dzindzeve, aholu kha sipwi; ni dzithonvu, aholu kha sipwi gununga.

⁷Si na ni mandza, aholu kha si phari gilo; ni migondro si nayo, aholu kha si gimbili; migoloni gwawe gu mwalo lito nya guganele!

⁸ Avo va si wumbago va wuya va khodwa ga iso, va na fanana ni sithombe soso.

⁹Enu va na Israyeli tumbani PFHUMU Nungungulu; kholu uye khuye muphasedzeli ni gitshangu gyanu.

¹⁰Enu va nyumbani ga Aroni, tumbani PFHUMU Nungungulu; kholu uye khuye muphasedzeli ni gitshangu gyanu.

¹¹Enu mu khodwago ga Pfhumu, tumbani Nungungulu! Kholu uye khuye muphasedzeli ni gitshangu gyanu.

¹²PFHUMU Nungungulu a hi alakanyidego, a na hi kategisa; a na kategisa vathu va Israyeli, a kategisa ndranga ya Aroni.

¹³ A na kategisa avo va khodwago ga PFHUMU Nungungulu, avo nya vadugwane ni ava nya vakhongolo.

¹⁴PFHUMU Nungungulu a na engedzele livelego lanu, gumogo ni livelego la sanana sanu.

¹⁵PFHUMU Nungungulu giridego ndzadzi ni mafu, a na mi kategise, enu mwatshavbo.

¹⁶Ndzadzi ya gu lumba PFHUMU Nungungulu; aholu litigo a li ningede ga vathu.

¹⁷Avo va fudego kha va dhumisi PFHUMU Nungungulu, ambari avo va relelago tsadegoni nya vafi.

¹⁸Aholu ethu hi vbanyago, hi na dhumisa PFHUMU Nungungulu, gukhugela olu kala gupindruga. Aleluya! A na dhumiswe PFHUMU Nungungulu!