Read gitonga Dzindzimo 118 Bible Online

Dzindzimo 118 - gitonga bible

Dzindzimo 118

¹ Aleluya! Bongani PFHUMU Nungungulu kholu khwadi, kholu wuhindzi waye wu ngu simama kala gupindruga.

²Va na ganele va na Israyeli, khavo: “Wuhindzi waye wu ngu simama kala gupindruga.”

³Si na ganele sanana sa Aroni khiso: “Wuhindzi waye wu ngu simama kala gupindruga.”

⁴Va na ganele avo va thavago PFHUMU Nungungulu, khavo: “Wuhindzi waye wu ngu simama kala gupindruga.”

⁵Vbakari nya sigaradzo, nyi di lombelela ga PFHUMU Nungungulu, Uye a di nyi yingisa a nyi vbanyisa.

⁶ PFHUMU Nungungulu a na ni eni, kha nyi thavi gilo; a nga nyi gira ginani muthu?

⁷PFHUMU Nungungulu a na ni eni ni avo va nyi phasago; nyi na va wona na va gu padwa avo va nyi vengago.

⁸Gwadi ngudzu gu thavela ga PFHUMU Nungungulu guvbindra gu tumba muthu.

⁹Gwadi ngudzu gu tumba PFHUMU Nungungulu guvbindra gu tumba tshivba nya dzipfhumu.

¹⁰Nyi di randredwe khu mayigo yatshavbo; aholu nyi di ma pala linani ga PFHUMU Nungungulu.

¹¹Va di nyi randrede, va engedza gambe gu nyi randrela khu maphuvbo yatshavbo; aholu nyi di va mbembisa linani ga PFHUMU Nungungulu.

¹²Va di nyi pomela gukhwatshi dzinyosi, va dzura gukhwatshi nilo nya mavivi; aholu eni nyi di va mbembisa khu lina la PFHUMU Nungungulu.

¹³Va di nyi reda khu tshivba va fela gu nyi thesa, aholu PFHUMU Nungungulu a di ta nyi phasa.

¹⁴ PFHUMU Nungungulu khuye tshivba ni ndzimo yangu, khuye muvbanyisi wangu.

¹⁵Mitshatshani nya vathu nya gululame gu pwala lito nya gunengele ni guvbanyisa, khavo: “Libogo la nyamudye la PFHUMU Nungungulu li ngu samadzisa.

¹⁶Libogo la nyamudye la PFHUMU Nungungulu li ngu dzi khusedza, libogo la nyamudye la PFHUMU Nungungulu li ngu gira sisamadziso.”

¹⁷Kha nyi na ngafa, aholu nyi na vbanya; nyi fela gu tivisa mithumo ya PFHUMU Nungungulu.

¹⁸PFHUMU Nungungulu a nyi tsayiside khu tshivba, aholu kha nyi ningela gufani.

¹⁹Nyi tuleleni malimba nya gululame; nya gu vbweta gu bela nyi ya rungudza PFHUMU Nungungulu.

²⁰Eyi khu nyangwa ya PFHUMU Nungungulu, va na belago khiyo va nya gululama.

²¹Nyi ngu gu bonga Pfhumu, kholu u nyi pwide u khade muvbanyisi wangu.

²² Giwindri gi nga nyenywa khu vavbahi, gi khade gikoli nya gutshanganise nyumba.

²³ Satshavbo sesi, sigiro sa PFHUMU Nungungulu; si ngu liwugisa mahoni gwathu.

²⁴Eli khu litshigu a li giridego PFHUMU Nungungulu; hi na embelele hi kulungela khu gutsaka khu ilo.

²⁵ Khu wuhindzi wago PFHUMU Nungungulu, hi vbanyise! Hi ngu gu lomba, PFHUMU Nungungulu, hi kategise.

²⁶Kategide oyu atago khu lina la PFHUMU Nungungulu; ethu hi ngu gu rungudza na hiri Nyumbani ga PFHUMU Nungungulu.

²⁷Pfhumu khuye Nungungulu a hi ningago wenengedzo; mburiselani buzo khu matamu, kala dzikhonani nya giluvelo.

²⁸Uwe u Nungungulu wangu, eni nyi na gu rungudza, Uwe u Nungungulu wangu, eni nyi na gu khusedza.

²⁹Bongani PFHUMU Nungungulu, kholu khwadi, kholu wuhindzi waye wu ngu simama kala gupindruga.