Read gitonga Dzindzimo 138 Bible Online

Dzindzimo 138 - gitonga bible

Dzindzimo 138

¹Ndzimo ya Dhavhidhe PFHUMU Nungungulu, nyi na gu bonga khu monyo wangu watshavbo, nyi na embelela dzindzimo nya gubonge uwe mbeli ga vanungungulu.

²Nyi na khidzima nyumbani gwago nya guage nyi rungudza lina lago khu wuwadi ni lisine lago; kholu u dandriside situmbiso sago vbatshani nya sigiro satshavbo.

³Litshigu nyi nga lila gwago, u nyi hakhide; u engedzela tshivba nya hefemulo wangu.

⁴Vafumeli vatshavbo va mafuni va na dhumisa uwe PFHUMU Nungungulu, avbo va na pwago mahungu ya kanani gwago.

⁵Va na embelela va dhumisa sigiro saye, kholu wudhumo wa PFHUMU Nungungulu wukhongolo.

⁶Ambari ulo PFHUMU Nungungulu a guromo vbatshani ngudzu, Uye a ngu yingisa avo va dzi sodzisago; va nya matshandza, a gu vati nari khu hwindzo.

⁷Nya gu bani nyiri vbakari nya dzimhango, uwe u ngu nyi vbanyisa, wa gu thawuludza libogo lago la nyamudye u nyi vhikela ga valala vangu; u nyi vbanyisa khu tshivba yago.

⁸PFHUMU Nungungulu a na vbohisa mahegiso, thumo waye nya wadi a wu phedego gu wu gira avbo gwangu, PFHUMU Nungungulu, lihaladzo lago li ngu simama kala gupindruga, uwe PFHUMU Nungungulu, u nga digi ndzilani thumo nya mandza yago.