Read gitonga Dzindzimo 141 Bible Online

Dzindzimo 141 - gitonga bible

Dzindzimo 141

¹Ndzimo ya Dhavhidhe PFHUMU Nungungulu, nyi ngu gu rana, yingisa lito langu nya gu gu rana.

² Nombelo wangu wu na gwele kha nga libani li vbiswago mbeli gwago, mandza yangu ma na khugege iyo gwago kha nga phaso nya silambo.

³PFHUMU Nungungulu vega muwoneleli nya likana langu a khedzisela nyangwa nya likana langu.

⁴U nga digi monyo wangu wu dogorela guvivba; nyi nga hengeli ni va nya guvivba mithumoni gwawe, mwendro gu hodza navo mibuzo yawe.

⁵Nya gu tsayiswa khu muthu nya gululame, nya gu wona nari gwadi ga eni, a gu nyi kawuka, gu na gira nga mafura nya gunungele gwadi, nyi thedwago hungoni gwangu. Aholu gima kha nya dzumela gu zundzwa khavo va girago guvivba, kholu kha nyi garali khu gu lombelela nyi dwana ni mithumo yawe nya guvivbe.

⁶Vafumeli vawe va gu rinywa wulanga nya siwindri va thega vbavbatshi, khavbo vathu va na pimago gukhavo magana yangu khya lisine.

⁷Marambo yawe ma na phalalega nyangwani nya lithowo, gu fanana ni mafu nya gulimwe ma wusedwa.

⁸Aholu eni nyi nga gu simama gu tumba uwe, PFHUMU Nungungulu; nyi ngu thavela avbo gwago, u nga nyi digi.

⁹Nyi vbulugise ga mazinga va nyi dembedego, ni milaphwi ya vathu nya guvivbe.

¹⁰Va nya guvivba va na modwe khu milaphwi va dembidego vabune, gasi eni nyi na vbuluge nyi simama ndzilani gwangu.