Read gitonga Dzindzimo 143 Bible Online

Dzindzimo 143 - gitonga bible

Dzindzimo 143

¹Ndzimo ya Dhavhidhe PFHUMU Nungungulu, hakha nombelo wangu, neredza ndzeve u yingisa gulila gwangu, nyi hakhe khu gululama ni gutumbega gwago.

² U nga nyi thethisi eni githumi gyago, kholu, mwalo muthu a vbanyago nari mwalo nandru mbeli gwago.

³Kholu nala a gu nyi sanisa a nyi gandredzela vbavbatshi; a nyi gurumedza gu vbanya wulangani nya gidema, kha nga avo va fudego khu gale.

⁴Kholu, hefemulo wangu wu vbede tshivba ndrani gwangu, nya gupwa monyo wu titivala khanani gwangu.

⁵Nyi ngu dundruga matshigu ya gale, nyi ngu pimisela mithumo yago yatshavbo, nyi ngu alakanya siliwugiso u giridego khu mandza yago.

⁶Nyi ngu khusedza mandza yangu iyo gwago nyi lombelela, kha nga mafu nya gihala ma bangidego, hefemulo wangu wu na ni lidora nya uwe.

⁷Olu PFHUMU Nungungulu, vbiredza u nyi hakha; nyi ngu vbela tshivba; u nga nyi siheli khovbe yago, gasi nyi si fanani ni avo va fudego.

⁸Nyi nonedze lihaladzo lago gukhugela vbadzimindrutunu, kholu eni nyi tumbide uwe; hefemulo wangu nyi ngu wu yisa iyo gwago, nyi nonedze ndzila nyi yelago gubela khiyo.

⁹PFHUMU Nungungulu, nyi vbulugise ga valala vangu; kholu eni nyi ngu thavela avbo gwago.

¹⁰Uwe khuwe Nungungulu wangu, nyi hevbudze gu gira guhaladza gwago, liphuvbo lago nya wuhindzi, li na nyi gimbidzise khu ndzila nya gululame.

¹¹PFHUMU Nungungulu, nyi vbanyise khu kotani nya lina lago, nyi tshule gigaradzoni nya gikhongolo khu gululama gwago.

¹²Khu kotani nya wuhindzi wago, fuvisa valala vangu, mbembisa vatshavbo va nyi wugelago, kholu eni nyi githumi gyago.