Read gitonga Dzindzimo 145 Bible Online

Dzindzimo 145 - gitonga bible

Dzindzimo 145

¹Ndzimo ya Dhavhidhe Nyi na gu dhumisa uwe, Nungungulu Pfhumu yangu; nyi ngu gu bonga kala gupindruga.

²Nyi na gu bonga matshigu yatshavbo; nyi rungudza lina lago kala gupindruga.

³PFHUMU Nungungulu khongolo, a na ni fanelo nya guzundzwe; wugulu waye kha wu kodzwi gu pimwa.

⁴Mimela ni mimelana yi na embeledzelana mithumo yago, vatshavbo va na huwelela sigiro sago nya tshivba.

⁵Avo va na ganela khu wudhumo ni wugulu wago, eni nyi na embelela nyi pwadza siliwugiso sago.

⁶Gu na ganedwa khu mithumo yago nya tshivba nya guthavise, eni nyi na ganela khu wugulu wago.

⁷Avo va na alakanya wuhindzi wago nya wukhongolo, khu dzindzimo va na ganela khavo, u lulamide.

⁸PFHUMU Nungungulu khwadi, tade khu wuhindzi, a ngu timisela, a na ni wuhindzi nya wukhongolo.

⁹PFHUMU Nungungulu khwadi ga vathu vatshavbo; wuhindzi waye wukhongolo guvbindra satshavbo a giridego.

¹⁰Sivangwa satshavbo si na gu rungudze, PFHUMU Nungungulu; va na gu dhumise vatshavbo va khodwago gwago!

¹¹Va na ganela khu wudhumo nya wufumu wago, va huwelela mithumo yago nya tshivba,

¹²va na tivise ga sanana nya vathu, mithumo yago nya yikhongolo, ni wugulu nya mufumo wago.

¹³Mufumo wago wu ngu simama kala gupindruga, Uwe u na fumela mimela ni mimelana yatshavbo, PFHUMU Nungungulu tumbegide gikhati gyatshavbo, a gu gira mithumo yaye yatshavbo khu lihaladzo.

¹⁴PFHUMU Nungungulu a ngu tiyisela avo va kanakanago, a gu wusa avo va rerekago va thega.

¹⁵Maho nya sivangwa satshavbo, ma gu khedzisela uwe gu si ninga guhodza gwawe khu gikhati gi fanedego.

¹⁶U ngu thawuludza mandza yago nya wuhindzi, U khurisa sivangwa satshavbo nya guvbanye.

¹⁷PFHUMU Nungungulu lulamide ga dzatshavbo dzindzila dzaye, a na ni wuhindzi mithumoni yaye yatshavbo.

¹⁸PFHUMU Nungungulu womo vbafuvbi ni vatshavbo va mu ranago, ni ga vatshavbo va mu lombago khu lisine.

¹⁹Uye a gu ninga esi va si vbwetago avo va mu thavago; a ngu va yingisa va gu mu lomba giphaso, a va vbanyisa.

²⁰PFHUMU Nungungulu a ngu vhikela vatshavbo va mu golago: Aholu vatshavbo va nya guvivbedwa khu monyo va na mbembiswa.

²¹Nyi na rungudza PFHUMU Nungungulu gikhati gyatshavbo, sivangwa satshavbo si vbanyago si na dhumise lina laye nya guage kala gupindruga.