Read gitonga Dzindzimo 147 Bible Online

Dzindzimo 147 - gitonga bible

Dzindzimo 147

¹Aleluya! A na dhumiswe PFHUMU Nungungulu, gwadi gu dhumisa Nungungulu wathu khu dzindzimo; gululamide, fanede gu dhumiswa.

²PFHUMU Nungungulu a ngu wusa Jerusalema, a gu tshanganisa avo va phalalegidego va Israyeli.

³A ngu tangadzisa myonyo yi khuvekidego, a hungelela silondra sawe!

⁴Vegide tengo nya dzinyeledzi, a dzi rana khu malina yawe.

⁵Khongolo khu Nungungulu wathu nya Tshivba Yatshavbo; guti gwaye gu mwalo mivbingano.

⁶PFHUMU Nungungulu a ngu khusedza va nya gusolega, a gu tshisa vbavbatshi va nya myonyo nya guvivbe.

⁷Embelelani ga PFHUMU Nungungulu ni gu mu bonga; kulungelani Nungungulu wathu khu gitendre.

⁸Khuye a fenengedzago ndzadzini khu mapfhi, a wisago ndzadzi mafuni ni gu bugisa mwasi sigomoni;

⁹Khuye a hodzisago sirengo, ni gu lisedzela sifondro nya mahigonganye gikhati si lilago.

¹⁰Kha tsakeli tshivba nya dzikavalu, mwendro gu tsakiswa khu wundrena nya muthu.

¹¹PFHUMU Nungungulu a gu tsakiswa khu vale va gu ni githawo gwaye, ni vale va tumbago wuhindzi waye.

¹²Uwe Jerusalema rungudza PFHUMU Nungungulu; uwe Siyoni, dhumisa Nungungulu wago.

¹³Kholu a ngu tiyisa malimba nya dzinyangwa dzago, a kategisa sanana sago ndrani nya libhiyo lago.

¹⁴A ngu tiyisa gurula mivbinganoni nya litigo lago, a gu khurisa khu wuguvbi nya wadi nya tirigu.

¹⁵Uye a ngu rumela milayo yaye tigoni; magana yaye ma gu vbiredza gu phalalega ma hakhwa.

¹⁶A ngu tshisa girame gi aga kha nga mawoya, a gu swaya maralala gukhwatshi nguma.

¹⁷A ngu tshisa siwindri nya mati kha nga maralala, mwalo muthu a tiyelago girame gyakone.

¹⁸A gu rumela magana yaye, siwindri nya mati sa gu nyiviliga; a wusa phuvbo yi furugedza khu tshivba, ma goga mati.

¹⁹A ngu sawutela mahungu yaye ga Jakobe, ni sileletelo ni milayo yaye ga na Israyeli.

²⁰Uye kha gira silo nya nga esi ga mambe mayigo; kha ma tulela guti sileletelo saye. Aleluya! A na dhumiswe PFHUMU Nungungulu!