Read gitonga Dzindzimo 148 Bible Online

Dzindzimo 148 - gitonga bible

Dzindzimo 148

¹Ndzimo nya gudhumise PFHUMU Nungungulu! Aleluya! Dhumisani PFHUMU Nungungulu! A na dhumiswe PFHUMU Nungungulu ndzadzini, mu dhumiseni enu mu vbanyago vbatshani.

²Dzingilozi dzaye dzatshavbo dhumisani Pfhumu; mu dhumiseni enu sivangwa satshavbo sa ndzadzini.

³Lidambo ni ngima, si na mu dhumise, mu dhumiseni enu dzinyeledzi dzatshavbo mu wenengedzago.

⁴Dzindzadzi nya dzindzadzi, dzi na mu dhumise, mu dhumiseni enu mati mu guromo vbatshani nya ndzadzi.

⁵Dhumisani mwatshavbo lina la PFHUMU Nungungulu, kholu uye a di ruma, si gu vangwa silo satshavbo.

⁶A si tiyiside malangani gwaye kala gupindruga, a si ningide nayo si tandregago gu wu yeyisa.

⁷Mafuni a na dhumiswe PFHUMU Nungungulu, sirengo nya sikhongolo sa matini ni gueta gwatshavbo nya linene;

⁸nilo ni maralala, girame ni hunguva; dziphuvbo nya tshivba mu girago guruma gwaye;

⁹sigomo satshavbo ni sigomwana; misimbo nya mihandro ni misimbo yatshavbo nya misedhari;

¹⁰sirengo nya likhabi ni sifuyo satshavbo, sinyoni si vbuvbago ni sirengo si khwirirago khu lididi;

¹¹mu dhumiseni enu vafumeli va mafuni momu ni vathu vatshavbo, vathangeli ni valamuli vatshavbo nya litigo;

¹²madzaha ni dzimbiri, sikhosane ni sanana.

¹³Mwatshavbo dhumisani lina la PFHUMU Nungungulu, kholu lina laye li khusegide guvbindra malina yatshavbo; wudhumo waye wu khusegide vbatshani nya ndzadzi ni mafu.

¹⁴Uye a ngu khusedza tshivba ya vathu vaye, gasi a rungudzwe khu sihathwa saye satshavbo, gasi a dhumiswe khu vathu vatshavbo va na Israyeli, a gu vathu a va golago. Aleluya! A na dhumiswe PFHUMU Nungungulu!