Read gitonga Dzindzimo 17 Bible Online

Dzindzimo 17 - gitonga bible

Dzindzimo 17

¹Nombelo wa Dhavhidhe Yingisa PFHUMU Nungungulu, gululama nya mahungu yangu, hakha gulila gwangu; yingisa nombelo wangu, kha wu dugi khu kanani nya malipha.

²Gulamudwa gwangu gu nate khiyo gwago, maho yago ma na wone gululama gwangu.

³Ambari u khedzisa monyoni gwangu, u nyi linga vbakari nya wutshigu, u nyi lingedzela khu nilo, gima khu na nga mana guvivba ga eni; likana langu gima kha la yeyisa,

⁴kha nya gira guvivba kha nga vambe vathu. Eni nyi digide dzindzila nya wughevenga, nyi landrisa ndzila nya nayo wago.

⁵Migondro yangu kha ya tshunganela, nyi di simama gu landrisela khu migondroni gwago.

⁶Eni nya gu rana uwe, kholu u ngu nyi hakha, Nungungulu wangu! Neredza ndzeve yago eno gwangu, upwa nombelo wangu.

⁷Nonedza lihaladzo lago, Uwe u vbanyisago ga valala oyu a thavelago nyamudye gwago.

⁸Nyi vegise kha nga ndzololo nya liso lago, nyi sihe vbavbatshi nya mambapi yago,

⁹hwindzo ni va nya guwegela va nyi tshanisago ni valala va nyi randredego.

¹⁰Avo va gu bangisa myonyo yawe, va ganela matshandza khu magana yawe.

¹¹Va gu landrelela migondro yathu, olu va hi randrede. Va gu hi ronogela, na va fela gu hi thesa vbavbatshi!

¹²Va gu fanana ni nghala yi gu na ni mahika khu pfimba waye; ni ginghalana gi varamidego phalani gwaye.

¹³PFHUMU Nungungulu, wuga u ema! Dwana navo! U va thesa vbavbatshi! Litshari lago li na nyi vbulugise ga muthu nya guvivbe.

¹⁴Khu mandza yago, PFHUMU Nungungulu, nyi vbanyise vbakari nya vathu nya mafu, avo va hakhide tshatshazelo wawe va nga gu vbanya mafuni momu. Aholu, vale va gu tumbago va khurise khu thomba yago, thomba yi enelago gu khurisa sanana sawe yi bwelo khavbo yi tshalela situgulwana sawe.

¹⁵Gasi eni, khu lisine, nyi na wona khovbe yago; gikhati nyi wugago nyi na khura khu gu wona giyemo gyago.