Read gitonga Dzindzimo 18 Bible Online

Dzindzimo 18 - gitonga bible

Dzindzimo 18

¹Ga muthangeli nya tsawa nya vaembeleli. Ndzimo ya Dhavhidhe, githumi gya PFHUMU Nungungulu, embide ndzimo yeyi gikhati PFHUMU Nungungulu, a nga mu vbulugisago ga valala vaye vatshavbo ni mandzani ga Sawule. A ganela, khuye: Eni nyi ngu gu haladza khu monyo wangu, uwe PFHUMU Nungungulu, khuwe tshivba yangu,

²PFHUMU Nungungulu, givhikelo gyangu, likhokhola langu, mudzegisi wangu; nyi ngu thavela gwaye, muvhikeli wangu, gitshangu ni tshivba nya guvbanyiswe gwangu, langwe yangu nya gutiye, wuthavelo wangu.

³Eni nyi di rana PFHUMU Nungungulu, a gu ni fanelo nya gurungudzwe, a na nyi vbanyisa ga valala vangu.

⁴Mavimbi nya lufu ma di nyi fenengedza, nyi langaladzwa khu mati nya tshivba.

⁵Tshivba nya lufu yi di nyi randrela nyi modwa khu mazinga yaye.

⁶Wuvini gwangu, nyi di rana PFHUMU Nungungulu, nyi di khusa lito nyi rana Nungungulu wangu; Uye khu nyumbani gwaye a di yingisa lito langu, huwa yangu yi di vboha dzindzeveni gwaye.

⁷Litigo li di thuruga li ndrendremela, matshina nya sigomo ma di kutsungwa khu kotani nya likhulo laye.

⁸Wu di duga wutshi khu dzithonvuni gwaye, khu kanani gwaye, gu duga nilo nya guvbise, gu duga magala nya gungangamele.

⁹Uye a di tula ndzadzini a tshiga, na gandride lipfhi nya gusivbale migondroni gwaye.

¹⁰A di khilela likerubhimi a puruma, a vbuvba mambapini nya phuvbo.

¹¹A di dzega gidema a gira gifenengelo gyaye, tshatsha waye wu di girwa khu mati nya gusivbale ni mapfhi nya guthise.

¹²Khu gungangamela nya khovbe yaye, mapfhi ma di phalalega, gu gira maralala ni magala nya nilo

¹³PFHUMU Nungungulu a di pandra mabara ndzadzini, oyu a guromo vbatshani ngudzu a di pwadza lito laye.

¹⁴A di rinya sighalala saye a va phalalegisa, a di va tutumisa khu gulasa gwaye.

¹⁵Khavbo avbo, gu di wonega gueta nya yiphwa, gu fuguga matshina nya litigo khu kotani nya gudzume gwago PFHUMU Nungungulu, ni phuvbo yi nga furugedza khu dzithonvuni gwago.

¹⁶Khu vbatshani a guromo iyo, a di rumela guta nyi dzega, a nyi dusa khu matini nya mwedzi nya tshivba.

¹⁷A nyi vbulugiside ga nala nya tshivba ni ga avo va nyi vengago, kholu va diri ni tshivba gu nyi vbindra.

¹⁸Va di nyi wugela litshigu nyi nga bani nyiri wuvini, aholu PFHUMU Nungungulu a di ta nyi tiyisa.

¹⁹A di nyi dusa a nyi yisa hwindzo ni mhango, a nyi vbulugisa kholu a di gu nyi haladza.

²⁰PFHUMU Nungungulu a di nyi phara gukhedza khu gululama gwangu, a nyi tshatshazela, kholu mandzani gwangu gu mwalo nandru.

²¹Kholu nyi landriside dzindzila dza PFHUMU Nungungulu, gima kha nya wugela Nungungulu wangu.

²²Milayo yaye yatshavbo yi diri mbeli gwangu, gima kha nya hambana ni sileletelo saye;

²³Nyi tumbegide mahoni gwaye nyi dzi vegisa nyamba ghoha.

²⁴PFHUMU Nungungulu a ngu nyi tshatshazela khu kotani nya gululame gwangu, khu maho yaye a ngu wona gukhuye nyi mwalo nandru.

²⁵Ga oyu a tumbegidego, Uwe u tumbegide, U lulamide ga oyu a lulamidego.

²⁶U agide ga oyu a agidego aholu, ga oyu nya guvivbe u ngu nonedza wugengeli.

²⁷Kholu uwe wa gu vbanyisa sisiwana u tshisa vbavbatshi va nya matshandza.

²⁸PFHUMU Nungungulu, khuwe kandriya yangu, Nungungulu wangu, wenengedza gidema gyangu.

²⁹Khu gu phaswa khu uwe nyi ngu bela litungani, khu tshivba ya Nungungulu wangu, nyi ngu ndraga mabhiyo.

³⁰Ndzila ya Nungungulu yi lulamide, magana ya PFHUMU Nungungulu ma tumbegide, khuye gitshangu ga vatshavbo va thavelago gwaye.

³¹Khu mani a gu Nungungulu vbavbandze ga PFHUMU Nungungulu, basi? Khu mani muvhikeli, vbavbandze ga Nungungulu wathu?

³²Uye khuye Nungungulu a nyi ambagisago tshivba, khuye a lulamisago ndzila yangu.

³³ Khuye a vbevbugisago mawundru yangu ma fanana ni aya nya yisya, a nyi tiyisa vbatshani nya sigomo sangu.

³⁴A ngu hevbudza mandza yangu gu dwana nyimbi ni mawogo yangu gu ghwimba wulaho nya gikete.

³⁵Uwe u ngu nyi ninga gitshangu gyago nya guvbanyise, libogo lago la nyamudye li ngu nyi tiyisa, khu garali khu gu nyi sayisa khu wuwadi wago.

³⁶U ngu anamisa ndzila migondroni gwangu, mawundru yangu kha ma khuyugeli.

³⁷Nyi di landra valala vangu nyi va mola, kha nya bwelela hwane na nyi si gu va mbembisi.

³⁸Eni nyi va sasede, va si kodzi ni gu wuga, va thegela vbavbatshi nya migondro yangu.

³⁹U nyi ambagiside tshivba nya guye dwana nyimbi u nogisa valala vangu va khoza gwangu.

⁴⁰U ngu nyi ninga mihwambo ya valala vangu, gasi nyi fuvisa avo va nyi vengago.

⁴¹Avo va gu lila, aholu mwalo nya gute va vbanyisa; va gu lila ga PFHUMU Nungungulu, aholu uye kha va hakhi.

⁴²Eni nyi di va kuya kha nga kudzudzwane wu phalalegiswago khu phuvbo, nyi di va dzudzuga kha nga maraga ya ndzilani.

⁴³Uwe u di nyi vbulugisa mayungani ya vathu vangu, U nyi gira muthangeli nya mayigo; lihundzu nyamba liti li ngu nyi thumela.

⁴⁴Va nya mayigo va nguta va ta khoza gwangu, avo va nga nyipwa, va di nyi yingela.

⁴⁵Sanana sa va nya mayigo sa gu vbela tshivba, si duga khu makhokholani gwawe na si gu ndrendremela.

⁴⁶A na vbanye PFHUMU Nungungulu, a na rungudzwe muvhikeli wangu, a na khusedzwe Nungungulu, muvbanyisi wangu;

⁴⁷Nungungulu khuye a nyi ningago tshivba nya guphodze; khuye a nyi ningago gu fumela mayigo.

⁴⁸Uwe u ngu nyi vbulugisa ga valala vangu va tadego khu likhulo, u nyi khusedza ga vale va nyi vengago, u nyi tshula ga muthu nya dzihanyi.

⁴⁹ Khu guralo, eni nyi ngu gu rungudza vbakari nya mayigo, PFHUMU Nungungulu, nyi ngu emba rungudzo nya lina lago.

⁵⁰Uye khuye a ningago gupala mufumeli waye, gambe a ngu yeyedza lihaladzo ga wule a mu hathidego, khu kotani ya Dhavhidhe ni sanana saye kala gupindruga.