Read gitonga Dzindzimo 2 Bible Online

Dzindzimo 2 - gitonga bible

Dzindzimo 2

¹Khu ginani va nya mayigo va wusago pfilupfilu? Khu ginani va hungago gikungo nyamba phasa gilo?

² Vafumeli nya litigo va wugide, manganagana ma ngu gira gikungo ma wugela PFHUMU Nungungulu ni gihathwa gyaye, khavo:

³Hi na kavilele makhetshe a hi hungidego khayo.

⁴Wule a vbanyago ndzadzini a ngu va hega; PFHUMU Nungungulu a ngu va tsorodzela.

⁵A na va embela na tade khu likhulo, a va thela hwanga khu likhulo laye, khuye:

⁶“Kheni nyi nga emisa mufumeli wangu vbatshani nya gigomo gyangu nya gukatege gya Siyoni.”

⁷ Nyi na huwelela nyi tivisa thetho wa PFHUMU Nungungulu. Uye a di nyi embela, khuye: Uwe u Gyanana gyangu, muhuno nyi gu velegide.

⁸Nyi lombe nyi na gu ninga mayigo ma khala thomba yago, mafu yatshavbo ma na lumba uwe.

⁹ U na ma pandra khu ndronga nya dzisimbi, u na ma khungumulela kha nga kanvu nya libumba.

¹⁰Gasi olu, enu vafumeli gengelani; dzumelani gu kawukwa, enu valamuli nya litigo!

¹¹Khozelani PFHUMU Nungungulu khu githawo mu tsaka ni gu ndrendremela mbeli gyaye.

¹²Khidzimani mawundruni ga mwamana gasi a si gorogi, mu si mbembi na mu ngari ndzilani, kholu hwane nya gikhatinyana a na tala khu likhulo. Va kategide vatshavbo vale va thavelago gwaye.