Read gitonga Dzindzimo 22 Bible Online

Dzindzimo 22 - gitonga bible

Dzindzimo 22

¹Ga vathangeli nya tsawa nya vaembeleli. “Yisya ya Wuronga.” Ndzimo ya Dhavhidhe Nungungulu wangu, Nungungulu wangu, khu ginani u nyi digidego? Ambari nyi wombago dzihuwa, nombelo wangu kha wu vbohi gwago.

²Nungungulu wangu, nyi ngu lila vbakari nya mihani, uwe khu nyi hakhi, wutshigu gima kha nyi mani gurula.

³Ambari khu kharato, Uwe u agide, u vbanyago vbakari nya wudhumo wa Israyeli.

⁴Vababe vathu va di tumba uwe; va di gu tumba, uwe u di va vbanyisa;

⁵va di lila gwago, va tshulega, va di tumba uwe, gima kha va dzi laya.

⁶Gasi eni, nyi giwungu, kha nyiri muthu; nya gu hegwa khu vathu, nyi nyenywa khu litigo;

⁷ vatshavbo va nyi wonago va gu nyi hembulula; va hama likana, va khiniga mihungo, khavo:

⁸ “Tumbide PFHUMU Nungungulu, a na vbanyiswe khuye; a na mu vbanyise a gu bani a mu haladza.”

⁹Kholu khuwe u nga nyi dusa khu ndrani, u nyi vega vbamarumbitunu ga mayi wangu.

¹⁰Eni nyi ningedwe gwago gukhugela litshigu nya guvelegwe gwangu; uwe u Nungungulu wangu gukhugela ndrani ga mayi wangu.

¹¹U nga khali hwindzo, kholu mhango yomo vbafuvbi, nyi mwalo muthu nya gu nyi phase.

¹²Nyi randredwe khu valala nya gutale, kha nga dzimombe nya tshivba dza tigoni ga Bhasani;

¹³dza gu nyi tulela magana yawe, kha nga nghala yi ngurangurago, gasi gu nyi vbadzulela.

¹⁴Nyi vbaladzidwe vbavbatshi kha nga mati, marambo yangu yatshavbo ma gu kunugela; monyo wangu wa gu fanana ni sera yi nyiviligago ndrani gwangu.

¹⁵Khanani gwangu gu bangide kha nga gindzengele nya libumba; lidimi langu li dandramede sihayani, uwe wa gu nyi rinya avbo nya kudzudzwane nya lufu.

¹⁶Nya gu randredwa khu tsawa nya sighevenga; kha nga dzimbwa, wu nyi vbadzulede mawogo ni mawundru.

¹⁷Nyi ngu kodza gu saya marambo yangu yatshavbo; avo va gu nyi khedza khu gu nyi ronogela.

¹⁸ Va kabana khu gyawe guambala gwangu, va gira nyatumbatumbane khu libhadzi langu.

¹⁹Khu guralo, PFHUMU Nungungulu, u nga hambani ni eni; uwe khuwe tshivba yangu, vbiredza u ta nyi phasa.

²⁰Vbulugisa hefemulo wangu ga litshari, u nga nyi digi nyi hodzwa khu dzimbwa.

²¹Nyi vbulugise kanani nya nghala ni dzikhehoni nya nyari; ina, nyi ninge phindrulo.

²² Nyi na huwelela lina lago ga vandriyangu; nyi na embelela wudhumo vbakari nya tshangano;

²³enu mu thavago PFHUMU Nungungulu, mu rungudzeni; mu dhumiseni enu mwatshavbo situgulwana sa Jakobe; mu ningeni githawo enu mwatshavbo livelego la Israyeli.

²⁴Kholu kha nyenya gilo ambari gu venga gu vbisega nya gisiwana, ambari gu mu sihela khovbe yaye, aholu a mu ningide avbo a nga lombago giphaso.

²⁵Nyi na gu dhumisa nyamba garala vbakari nya tshangano nya khongolo, vbakari ga vale va gu ningago githawo, nyi na tiyisa gisambanyo gyangu.

²⁶Sisiwana si na hodza si khura; avo va vbwetago PFHUMU Nungungulu, va na mu rungudza. Myonyo yawe yi na vbanye kala gupindruga.

²⁷Vathu va mafuni gwatshavbo va na muti PFHUMU Nungungulu va vbindrugedza avbo gwaye; mbeli gwaye mayigo yatshavbo ma na mu khozela.

²⁸Kholu PFHUMU Nungungulu a ngu fuma, khuye a fumago vathu vatshavbo.

²⁹Vakhongolo vatshavbo va tigoni va na hodza va noga mbeli gwaye; ni vatshavbo vale va fudego va na noga mbeli gwaye, kala ni wule a gumba dzi kodza abune gu vbanyisa womi waye.

³⁰Melego wawe wu na mu thumela; va na tivisa Pfhumu ga mimela ni mimelana yi nga gutago.

³¹Va na tivisa gululama gwaye ga lihundzu li na velegwago, satshavbo esi Pfhumu a giridego.