Read gitonga Dzindzimo 25 Bible Online

Dzindzimo 25 - gitonga bible

Dzindzimo 25

¹Ndzimo ya Dhavhidhe Ga uwe PFHUMU Nungungulu, nyi ngu khusedza hefemulo wangu.

²Nungungulu wangu, eni nya gu tumba uwe, nyi nga khali dzitshoni, valala vangu va nga nyi pali.

³Avo va tumbago uwe, kha va khali dzitshoni; va na thedwe dzitshoni avo va gu dangago khu silo nyamba phasa gilo.

⁴Nyi nonedze dzindzila dzago PFHUMU Nungungulu, nyi hevbudze dzindzila dzago.

⁵Nyi gimbidzise khu lisine lago, nyi hevbudze, kholu uwe khuwe Nungungulu, muvbanyisi wangu, nyi ngu tumba uwe gikhati gyatshavbo.

⁶PFHUMU Nungungulu, dundruga wuhindzi ni lihaladzo lago, ga ethu, gukhugela gupindruga nya gupindruge.

⁷U nga alakanyi sihoso sangu, ambari sighoho nyi giridego wudzahani wangu. Nyi dundruge khu lihaladzo lago, khu kotani nya wuwadi wago PFHUMU Nungungulu.

⁸PFHUMU Nungungulu khwadi, gambe lulamide, khu guralo, a ngu nonedza ndzila sighohi.

⁹A ngu gimbidzisa va nya gusolega khu nayo, a hevbudza va nya gurula ndzila yaye.

¹⁰Dzindzila dza PFHUMU Nungungulu dzatshavbo lihaladzo ni lisine, ga vatshavbo va vegisago gidzumeledzwano gyaye ni sileletelo saye.

¹¹PFHUMU Nungungulu, khu kotani nya lina lago, tsetselela giwono gyangu; kholu gikhongolo ngudzu.

¹²Muthu a thavago PFHUMU Nungungulu, Uye a na mu hevbudza ndzila nya gubele khiyo;

¹³a na vbanya na tsakide, sanana saye si na fuma litigo.

¹⁴PFHUMU Nungungulu a gu tulela guti sihalo waye vale va mu thavago, a va tivisa gidzumeledzwano gyaye.

¹⁵Maho yangu ma gu khedzisela PFHUMU Nungungulu gikhati gyatshavbo, kholu uye a ngu dusela milaphwi migondroni gwangu.

¹⁶Khedza eno gwangu, nyi pwele wuhindzi, kholu nyi musaniseki nyambana mubangaladzi.

¹⁷Gu engedzelanide gusaniseka nya monyo wangu, nyi tshatugise sigaradzoni gwangu.

¹⁸Wona gugaradzega ni guvbisega gwangu, u nyi divalela siwono sangu satshavbo.

¹⁹Wona valala vangu va engedzelanago gutala, va gu nyi venga ngudzu khu tshivba.

²⁰Sayisa guvbanya gwangu. U nyi vbanyisa. Nyi nga khali dzitshoni khu gu thavela avbo gwago.

²¹Lisine ni gululama si na nyi sayise; kholu eni nya gu tumba uwe PFHUMU Nungungulu.

²²Nungungulu, tshula Israyeli ga sigaradzo saye satshavbo.