Read gitonga Dzindzimo 27 Bible Online

Dzindzimo 27 - gitonga bible

Dzindzimo 27

¹Ndzimo ya Dhavhidhe PFHUMU Nungungulu khuye wenengedzo ni guvbanyiswa gwangu; nyi na thava mani? PFHUMU Nungungulu muvhikeli nya guvbanye gwangu; nyi na thava mani?

²Gikhati sighevenga si nyi randrelago, gasi gu tsagudzela nyama yangu; Khavo valala vangu va nyi nyenyago, va tshunganelago va thega.

³Ambari nyi fenengedzwa khu dzinyimbi, gima kha nyi na thava gilo; ambari valala vangu va gu nyi randrela, monyo wangu kha wu na thava gilo, nyi na simama nyi tumba.

⁴Gilo gimwegyo basi nyi lombago ga PFHUMU Nungungulu, nyi gi dogorelago khu monyo wangu watshavbo: Khu gu khala Nyumbani ga PFHUMU Nungungulu matshigu yatshavbo nya guvbanye gwangu, nyi fela gunengela khu gutshamba ga PFHUMU Nungungulu ni gu alakanya Nyumba yaye.

⁵Kholu uye a ngu nyi siha Tshatshani gwaye, litshigu nya sigaradzo; a gu nyi siha gusihalani nya Tshatsha waye; a nyi khusedza vbatshani nya giwindri.

⁶Olu nyi na khusedza hungo wangu vbatshani ya valala va nyi randredego, nyi na bela nyumbani gwago nyi ningela miphaso nya mhamba nya gubonge. Nyi na embelela nyi womba dzingoma, nyi rungudza PFHUMU Nungungulu.

⁷Yingisa PFHUMU Nungungulu lito nya nombelo wangu, nyi pwele gambe wuhindzi u nyi hakha.

⁸Monyo wangu wu ngu nyi embela, khuwo: “Vbweta khovbe yaye.” Khu guralo, nyi na vbweta khovbe yago PFHUMU Nungungulu.

⁹U nga nyi siheli khovbe yago, u nga dzudzugi githumi gyago khu likhulo; uwe khuwe basi muphasedzeli wangu, u nga nyi digi, gambe u nga nyi hotshi, Nungungulu muvbanyisi wangu.

¹⁰Kholu, babe ni mayi wangu va gu nyi diga, PFHUMU Nungungulu a na nyi hakha.

¹¹Nyi hevbudze ndzila yago PFHUMU Nungungulu, nyi gimbidzise khu ndzila nya gululame khu kotani nya talo ya valala vangu;

¹²u nga nyi ningeli ga valala vangu, va gira kheni guhaladza gwawe, kholu va nyi wugede va nyi singedza malipha, va tade khu wughevenga.

¹³Nyi ngu tumba gukheni nyi na wona wuwadi wa PFHUMU Nungungulu nyi nga gu vbanya mafuni.

¹⁴Tumba PFHUMU Nungungulu u tiya, tiyisa monyo wago, u tumba PFHUMU Nungungulu.