Read gitonga Dzindzimo 30 Bible Online

Dzindzimo 30 - gitonga bible

Dzindzimo 30

¹Ndzimo nya gukategise Nyumba. Ndzimo ya Dhavhidhe Eni nyi ngu gu khusedza, PFHUMU Nungungulu, kholu u nyi vbanyiside, khwa diga valala vangu va ghiya hwamboni gwangu.

²PFHUMU Nungungulu wangu, eni nyi lide avbo gwago u nyi halawugisa.

³PFHUMU Nungungulu, u wogode womi wangu phalani nya vafi; u nyi wuside gasi nyi si releli thowoni.

⁴Embelelani dzindzimo ga PFHUMU Nungungulu, enu mwatshavbo vakhodwa yaye, rungudzani lina laye nya guage.

⁵Kholu likhulo laye kha li hweli guvbindra; makategwa yaye ma gu pindruga gikhati gyatshavbo, vbasilambotunu, gu manega gililo, vbadzimindrutunu, gu wuga gutsaka.

⁶Gasi eni nyi di ganela na nyi tangade, kheni: “Gima kha nyi na dzudzugwa.”

⁷PFHUMU Nungungulu, wuhigo wago wu di nyi ninga tshivba ni wudhumo; aholu, u sihide khovbe yago, eni nyi tedwa khu rerema.

⁸Eni nyi di lila ga Uwe PFHUMU Nungungulu, nyi di lomba ga Nungungulu wangu, kheni:

⁹Nya gufa eni, ginani u na wuyedwago khigyo? U na bhindzula ginani nya gu relela thowoni? Ina kudzudzwane wu na gu dhumisa, wu tivisa lisine lago, gani?

¹⁰Yingisa, PFHUMU Nungungulu, nyi pwele wuhindzi; khala muphasedzeli wangu, PFHUMU Nungungulu!

¹¹U vbindrugedzide gililo gyangu khu gutsaka; U nyi tshude gilendra, u nyi ambagisa mwendra nya gutsake.

¹²Khu guralo, monyo wangu wu ngu embelela gwago nyamba garala. PFHUMU Nungungulu wangu, nyi na gu rungudza kala gupindruga.