Read gitonga Dzindzimo 33 Bible Online

Dzindzimo 33 - gitonga bible

Dzindzimo 33

¹Vathu nya gululame kulungelani PFHUMU Nungungulu! Vale va lulamidego khavo va fanelago gu mu rungudza.

²Rungudzani PFHUMU Nungungulu khu gitendre, mu embelela dzindzimo khu gitendre nya likhumi dzingodzi.

³Embelelani Gwaye ndzimo nya yiphya; wombani khu tshivba na mu gu kulungela.

⁴Kholu magana ya PFHUMU Nungungulu ma lulamide, mithumo yaye yatshavbo yi tumbegide.

⁵Uye a gu gola gululama ni nayo; litigo li tade khu lihaladzo la PFHUMU Nungungulu.

⁶PFHUMU Nungungulu giride ndzadzini khu lito laye, khu liphuvbo la kanani gwaye, si wumbidwe sivangwa satshavbo.

⁷Uye a di tshanganisa mati ya phwani ma khala gigomo a vega minondrwa mivbinganoni gwaye,

⁸Litigo latshavbo li na ninge githawo PFHUMU Nungungulu, Vavbanyi vatshavbo va mafuni va na mu ninge githawo.

⁹Kholu uye a di ganela, si girega satshavbo; uye a ruma, satshavbo si girega.

¹⁰PFHUMU Nungungulu a ngu pfhungumula gikungo gya va nya mayigo ni gu thesa vbavbatshi mipimiso nya mayigo.

¹¹Aholu gikungo gya PFHUMU Nungungulu, gi ngu simama kala gupindruga.

¹²Li kategide litigo lile Nungungulu a gu uye PFHUMU Nungungulu, ni vathu a va hathidego gu khala thomba yaye.

¹³PFHUMU Nungungulu a gu khedza khu Ndzadzini; a wona vathu vatshavbo;

¹⁴Khu wulanga a khalago avbo, a gu khedzisa a wona vathu vatshavbo va vbanyago mafuni.

¹⁵Khuye a vbahago monyo nya muthu ni muthu, a wona satshavbo va girago.

¹⁶Mwalo mufumeli a dzi vbanyisago khu talo nya dzinyimbi dzaye; ambari ndrena gu dzi vbanyisa khu tshivba yaye nya yikhongolo.

¹⁷Dzikavalu nya nyimbi khandridzo dzi ningago muthu gupala; ambari na dziri ni tshivba nya yikhongolo, mwalo a dzi kodzago gu vbuluga.

¹⁸Maho ya PFHUMU Nungungulu, ma gu khedza vale va mu ningago githawo, ni ga vale va tumbago wuhindzi waye,

¹⁹gasi a vbulugisa lufuni mihefemulo yawe, ni gu va vbanyisa gikhatini nya ndzala.

²⁰Mihefemulo yathu ya gu khevisela PFHUMU Nungungulu, khuye muphasedzeli ni muvhikeli wathu.

²¹Khuye a gu gunengela gwathu, kholu hi ngu tumba lina laye nya gukatege.

²²PFHUMU Nungungulu, wuhindzi wago wu na khale vbatshani gwathu, kha nga hi tumbago uwe.