Read gitonga Dzindzimo 35 Bible Online

Dzindzimo 35 - gitonga bible

Dzindzimo 35

¹Ndzimo ya Dhavhidhe PFHUMU Nungungulu, thethisa avo va nyi singedzago, u dwana ni avo va nyi dwanisago.

²Dzega gitshangu u ambala givhikelo, u khuga u ta nyi phasa.

³Phara litshari ni makoke, u wugela vasanisi vangu; nyi embele, khuwe: “Eni kheni guvbanyiswa gwago.”

⁴Va na tale khu dzitshoni vatshavbo vale va zamago gu nyi songa; va na bwelele hwane va khala dzitshoni, avo va nyi girelago matshoho.

⁵Va na gire kha nga mavivi ma vbiyedwago khu phuvbo, va lundrwa khu ngilozi ya PFHUMU Nungungulu.

⁶Ndzila yawe yi na khale gidema ni gukwiriga, va na lundrwe khu ngilozi ya PFHUMU Nungungulu.

⁷Kholu na nyiri mwalo nandru va nyi riyede mazinga, vbavbandze nya nandru va nyi kembela liphala gasi nyi thegela umo.

⁸Va na dugedwe khu libango va si li vireligo, va na modwe vabune khu naphwi va wu dembidego; va thegela phalani va li kembidego.

⁹Hefemulo wangu wu na nengela ga PFHUMU Nungungulu, nyi na tsaka khu gu vbanyiswa khuye.

¹⁰Khu monyo wangu watshavbo, nyi na ganela, kheni: “PFHUMU Nungungulu, khu mani a fananago ni Uwe?” Kholu uwe u ngu tshudzisa gisiwana mandzani ga wule a gu ni tshivba gu mu vbindra, u vbanyisa khulungu ga vale va yi kalavelago.

¹¹Dzi ngu khuga dzifakazi nya malipha, dzi nyi singedza khu silo nyi si sitigo.

¹²Va nyi bweledzede wuwadi khu wuvivbi, va vbweta gu vbedza hefemulo wangu.

¹³Gikhati avo va nga manwa khu madwali, eni nyi di ambala silendra nyi hala nyamba hodza gilo, nyi di wuyelela gu gira nombelo na nyi gu nogide,

¹⁴nyi di gira bwelebwele guya va holela nga khwatshi nya gu tshanisekela pari mwendro ndriyangu; nyi lila, nyi noga vbavbatshi nga uye a lilago mayi waye.

¹⁵Gasi avo gikhati nyi nga thega, va di ghiya va tshangana gumogo; vathu nyamba vati, va di tshangana gasi gu nyi wugela nyi si giti igyo va nyi wugelago khigyo;

¹⁶Va nyi randrela na va gu nyi tsorodzela na va gu khukhurusa magwaha khu likhulo.

¹⁷Pfhumu u na si wonetela kala lini? Nyi vhikele ga ava va ngurangurago, vbanyisa womi wangu sambani nya dzinghala dzedzi.

¹⁸Nyi na gu bonga vbakari nya tshangano nya wukhongolo, nyi na gu rungudza vbakari nya vathu nya vangi.

¹⁹ Valala vangu va nga nengeli khu gutshaniseka gwangu, ma nga khwavbigi maho ya vale va nyi zondrago nyambana nandru.

²⁰Kholu avo gima kha va ganeli khu gurula; aholu va gu wugela va nya gurula mafuni, va luga mano nya gu va singedze guvivba.

²¹Va gu tula magana yawe va nyi singedza, khavo: “Ethu hi mu wone khu maho yathu.”

²²Aholu uwe PFHUMU Nungungulu u si wone nuwe esi, u nga deguli; u nga khali hwindzo ni eni, Pfhumu.

²³Wuga u nyi emela, uwe Nungungulu Pfhumu yangu, u nyi vhikela ga nandru wangu.

²⁴Nyi lamule khu nayo, wago PFHUMU Nungungulu, u nga va dzumedzisi va ghiya avbo gwangu.

²⁵Va nga pimisi, khavo: “Gwadi, hi giride esi hi nga si vbweta” va nga ganeli khu myonyoni gwawe, khavo: “Hi mu midzide.”

²⁶Va na khale dzitshoni va khunguvanyega, avo va nengelago khu gu saniseka gwangu; va na tale khu dzitshoni ni wusiwana avo va dzi khusedzago tshivbani gwangu.

²⁷Va na embelele va nengela, avo va dwanelago gululama gwangu, va na ganele gikhati gyatshavbo, khavo: “A na rungudzwe PFHUMU Nungungulu, a tsakiswago khu gu dugelela ga githumi gyaye!”

²⁸Lidimi langu li na embelela gululama gwaye, gikhati gyatshavbo nyi rungudza uwe.