Read gitonga Dzindzimo 37 Bible Online

Dzindzimo 37 - gitonga bible

Dzindzimo 37

¹Ndzimo ya Dhavhidhe. U nga garadzegi khu kotani nya vathu nya guvivbedwe khu myonyo, gambe u nga gireli lidiwo vale va girago guvivba.

²Kholu, va gu fanana ni mwasi, va na dandra nyamba hwela, kha nga mwasi nya gunyuge, va na wu na.

³Uwe tumba PFHUMU Nungungulu, gira nya sadi; u na vbaha tigoni u vbanya khu gukhadzisega.

⁴Vega ga PFHUMU Nungungulu gutsaka gwago, uye a na gu ninga gugola nya monyo wago.

⁵Guvbanya gwago gu vege mandzani ga PFHUMU Nungungulu tumba uye, a na gira satshavbo.

⁶A na wonegisa gululama gwago kha nga wenengedzo ni dzifanelo dzago kha nga lidambo li wenengedzago vbamihanitunu.

⁷Tumba PFHUMU Nungungulu u vega gwaye gitumbo gyago, u nga garadzegi khu vale va dugelelago guvbanyani gwawe, khu kotani nya muthu a thumisago wurena.

⁸Diga likhulo, u nyenya khorodza, u nga khali likhulo u nga ghoha.

⁹Kholu va nya likhulo va na fuviswa, aholu oyu a tumbago PFHUMU Nungungulu a na fumela litigo.

¹⁰Aholu khadukhadu, kha gu na wonega gambe muthu nya guvivbe, u na vbweta gu wona wulanga waye u si wu mani,

¹¹ aholu va nya gurula va na fumela litigo, va na nengela khu gurula nya gungi.

¹²Muthu nya guvivbe a gu wugela oyu nya gululame, a mu khukhurusela magwaha khu likhulo,

¹³aholu Pfhumu a na mu hega, kholu a ngu wona gukhuye matshigu yaye ma vbohide.

¹⁴ Va nya guvivba va gu homola matshari, va ghwimba wulaho gasi gu songa vale va gimbilago khu ndzila nya gululame, ni gisiwana ni khulungu.

¹⁵Khu guralo, litshari laye li na mu paya monyo, malaho yaye ma na fanyeledzedwa.

¹⁶Sidugwana va gu naso vathu nya gululame si na ni lisima, guvbindra thomba nya yingi nya vathu nya guvivbedwe khu monyo.

¹⁷Kholu mawogo nya vathu nya guvivbe ma na fanywa, aholu PFHUMU Nungungulu a na sayisa avo va lulamidego.

¹⁸PFHUMU Nungungulu a ngu mati matshigu nya vathu nya gululame; livelego lawe li na simama kala gupindruga.

¹⁹Kha va na khala dzitshoni matshiguni nya sigaradzo, matshiguni nya ndzala avo va na khuriswa.

²⁰Khu guralo, va nya guvivba va na mbemba, ni valala va PFHUMU Nungungulu, va na wu na nga mwasi wa panini, va na mwalalega nga wutshi.

²¹Muthu nya guvivbe a gu lomba kha bweledzi; gasi muthu nya gululame a gu pwela wuhindzi a ningela.

²²Avo va kategiswago khu PFHUMU Nungungulu, va na fumela litigo, avo va vadwago khuye va na mbemba.

²³PFHUMU Nungungulu a ngu tiyisa migondro nya muthu nya wadi a ngu nengedziswa khu ndzila yaye;

²⁴a gu tshunganela kha thegi, kholu PFHUMU Nungungulu a ngu mu phara khu libogo.

²⁵Nyi diri lidzaha, olu nyi gumbide, aholu gima nyi si gu woni muthu nya gululame na digidwe, mwendro livelego laye na li gu lomba silo nya guhodze.

²⁶Matshigu yatshavbo a di pwela wusiwana vathu a va ninga, khu guralo, livelego laye li kategide.

²⁷Hambana ni wuvivbi u gira wuwadi, u na simama gu vbanya kala gupindruga;

²⁸kholu PFHUMU Nungungulu a gu gola gululama, gima kha digi avo va khodwago gwaye; a na va vhikela gikhati gyatshavbo, aholu livelego nya vathu nya guvivbe li na mbembiswa.

²⁹Va nya gululama va na fumela litigo, va na vbanya umo kala gupindruga.

³⁰Khu kanani ga muthu nya gululame ga gu duga magana nya guti, ni lidimi laye la gu ganela iso si lulamidego.

³¹Monyoni gwaye a na ni nayo wa Nungungulu waye; migondro yaye kha yi na dhedhereka.

³²Muthu nya guvivbe a gu holelela muthu nya gululame a zama gu mu songa.

³³Aholu, PFHUMU Nungungulu kha na nga mu diga mandzani gwaye, gambe kha mu digi a konwa vbamahungutunu.

³⁴Tumba PFHUMU Nungungulu, u landrisa ndzila yaye; uye a na gu khusedza a gu ninga gu fumela litigo, u na wona gumbemba gwa va nya guvivba.

³⁵Nyi wonide muthu nya guvivbe na tade khu gu dzi gugumugisa, a nava gu fanana ni simbo nya gunyuge wa Libhanoni.

³⁶Aholu avbo nyi nga vbindra wu di mwalalegide, nyi mu vbweta, aholu gima kha nya mu mana.

³⁷Khedzisa muthu a vbeledego u wona muthu nya gululame; kholu muthu nya gurule a na mana vatugulu.

³⁸Aholu sindragamilayo si na fuviswa; ni livelego la va nya guvivba li na mbembiswa.

³⁹Aholu guvbanya gwa va nya gululama gwa guta khu ga PFHUMU Nungungulu, a va ningago tshivba gikhati nya sigaradzo.

⁴⁰PFHUMU Nungungulu a ngu va phasa a va vbanyisa, a na va vbulugisa ga va nya guvivba, a va vbanyisa kholu va thavede gwaye.