Read gitonga Dzindzimo 48 Bible Online

Dzindzimo 48 - gitonga bible

Dzindzimo 48

¹Ndzimo ya sanana sa Kore PFHUMU Nungungulu khongolo, a ngu yela gu rungudzwa ngudzu, dhoropani ga Nungungulu wathu.

² Gigomo gyaye nya gukatege, gi mburide ni gulapha, gi ngu tsakisa litigo latshavbo; gigomo gya Siyoni, khu phuvbo ga Wuronga, lidhoropa la Mufumeli nya khongolo.

³Dzinyumbani gwawe nya wufumu, Nungungulu a ngu dzi wonegisa kha nga wuthavelo.

⁴Khu guralo, vafumeli va pwananide gasi gu ya dwanisa lidhoropa;

⁵aholu na va li wone, va di tedwa khu rerema, va di hambanega mapimo va thava va tutuma khu guvbiredza.

⁶Avbovbo va di hungwa khu rerema nya yikhongolo, vapwa wuvi nya nga wa nyamayi a lumwago.

⁷Gufanana ni phuvbo ya Khugadambo yi fanyeledzelago mataro ya Tarisisi.

⁸Kha nga hi pwidego, hi si wone gambe kharato dhoropani ga PFHUMU Nungungulu nya Tshivba Yatshavbo, dhoropani ga Nungungulu wathu. Nungungulu a li tiyisidego kala gupindruga.

⁹Nungungulu, ethu hi ngu alakanya wuhindzi wago na hi romo nyumbani gwago.

¹⁰Kha nga lina lago, Nungungulu, kharato nuwo wuzundzo wago wu ngu vboha mahegiso nya litigo; libogo lago la nyamudye li tade khu gululama.

¹¹Gi ngu tsaka gigomo gya Siyoni, sanana sa Judha si ngu nengela khu kotani nya gulamule gwago.

¹²Dzuwulugani Siyoni, mu gimbilagimbila dhoropani gwatshavbo, mu saya makhokhola yaye;

¹³samalani mabhiyo yaye, mu khedzisisa dzinyumba dzaye nya wufumu, mu kodza gu embeledzela mimelana yi nga gutago.

¹⁴Oyu khu Nungungulu, khuye Nungungulu wathu kala gupindruga; khuye a na hi endredzago kala gufa.