Read gitonga Dzindzimo 49 Bible Online

Dzindzimo 49 - gitonga bible

Dzindzimo 49

¹Ga muthangeli nya tsawa nya vaembeleli. Ndzimo ya sanana sa Kore Upwani enu vathu nya mahundzu yatshavbo, tulani dzindzeve mupwe enu mu vbanyago tigoni,

²Nya gu ganela ga enu va nya gusolega ni va nya gu khalega, sitetema ni sisiwana mwatshavbo gumogo.

³Likana langu li na ganela guti, khu monyoni gwangu gu na duga mipimiso nya gugengele.

⁴Nyi na neredza dzindzeve dzangu nyipwa gihevbudzo, nyi na tula sihalo wangu na nyi gupwa gitendre.

⁵Khu ginani nyi na thavago matshigu nya guvivbe, gikhati sighevenga si nyi randrelago?

⁶Avo va tumbago dzithomba dzawe va gu dzi zundza khu talo nya wufumu wawe.

⁷Muthu kha dzi kodzi gu dzegisa ndriyaye, ambari gu livba tengo waye ga Nungungulu;

⁸kholu gu vbanyisa womi waye i tengo nya wungi ngudzu; muthu gima kha wu kodzi gu wu enedza,

⁹a gu vbweta gu laphisa guvbanya gwaye a vbuluga gufa.

¹⁰Wonani, va nya guti va ngufa siphuguphugu niso si ngufa gumogo ni maphuphulu, va tshiya dzithomba dzawe ga vambe vathu.

¹¹Lithowo lawe li na khala dzinyumba dzawe, va na vbanya umo khu mimela ni mimelana. Ambari na va ningide lina mayigo yawe.

¹²Aholu muthu nya gitetema kha simami gu vbanya mafuni; aholu, a gu fanana ni sirengo sifago.

¹³Gupimisa gwawe khwa wupumbu; ni avo va va landriselago va gu tsakiswa khu magana yawe.

¹⁴Va gu fanana ni dzinvuta dzi dongisedwago lithowo; muhavisi wawe khu lufu, va na vbiredza gu relela thowoni avbo givili gyawe gi na guya tsagudzedwa; avo va na vbanyela thowoni.

¹⁵Aholu, Nungungulu a na dzegisa hefemulo wangu a nyi tshula mandzani nya lufu, a nyi wugarela.

¹⁶U nga dzi garadzi, wa gu wona muthu na gu khala gitetema, wa gu wona guandra dzithomba nya ndranga yaye;

¹⁷kholu gufani gwaye gimwalo ni gimwegyo basi a na dzegago, wukhudhudhu waye kha wu na relela thowoni.

¹⁸Na gu vbanya a di dzi tsakisa abune, khuye: “Va ngu gu zundza kholu silo sago satshavbo si ngu gimbila gwadi,”

¹⁹a na ya patana gumogo ni vababe vaye, avo va gumba wona gambe wenengedzo.

²⁰Muthu a tadego khu dzithomba aholu na si pimisi, a gu fanana ni sirengo sifago.