Read gitonga Dzindzimo 55 Bible Online

Dzindzimo 55 - gitonga bible

Dzindzimo 55

¹Ga muthangeli nya tsawa nya vaembeleli. Khu sitendre. Ndzimo ya Dhavhidhe. Yingisa nombelo wangu, Nungungulu; nya gu gu lomba u nga nyi digi.

²Nyi yingise, u nyi ninga phindrulo; kholu nyi ngu swihala khu gusaniseka.

³Khu kotani nya huwa ya nala, ni tshanisa ya va nya guvivba, va ngu nyi vbedza tshivba, kholu va ngu nyi wugela na va tade khu likhulo.

⁴Monyo wangu wu ngu ndrendremela ndrani gwangu, hwanga nya gufe wu nyi fenengedzide.

⁵Nyi modwe khu hwanga ni gundrendremela, nyi fenengedzidwe khu gidema nya guthise.

⁶Khu guralo, nyi di ganela, kheni: “Nyi na ma mana hayini mambapi nya nga ya gipomba! Nyi fela gu duga nyi vbuvba, nyi mbaka hwindzo nyi hefemula.”

⁷Nyi di hadza gu thavela hwindzo nyi ya khala giwulani

⁸Nyi di hadza gu ya mana wuthavelo nya guya sihale avbo dziphuvbo nya gingulu.

⁹Pfhumu, pfhungumula ni gu fuvisa milayo yawe, kholu nya gu wona wughevenga ni siregera dhoropani.

¹⁰Wutshigu ni mihani va gu dzuwulugela mabhiyo yaye, dhoropani gu tade khu guvivba, wuvi ni tshanisa;

¹¹ndrani gwaye gu tade khu masingita; tshanisa ni wukanganyisi kha si dugi mitendrelani gwawe.

¹²Naripwani khu nala wangu a nyi valago, na nyi sipwi ngudzu wuvi; nari gu wugedwa khu oyu a nyi nyenyago nyi di hadza gu mana wulanga nyi mu sihalela.

¹³Aholu, khuwe muthu nya nga eni, mubangaladzi ni pari yangu nya gu yi tumbe.

¹⁴Hi nga bani hi gimbila gumogo, hi hengela gumogo mabhulo ni gu longoloka gumogo ni gidzemo guya Nyumbani ga Nungungulu.

¹⁵Va na pfinywe khu lufu, va relela phalani nya vafi va nga gu vbanya, kholu va gu fumbela guvivba myonyoni gwawe.

¹⁶Khu guralo, eni nyi na lombelela ga Nungungulu, PFHUMU Nungungulu a na nyi vbulugisa.

¹⁷Vbasilambotunu, vbadzimindrutunu ni vbamihanitunu, nyi na lila nyi dilela; Uye a napwa lito langu.

¹⁸Vbulugisa hefemulo wangu, khu gurula, ga avo va nyi lundrago; kholu avo vangi.

¹⁹Nungungulu a na nyipwa, a va tshisa vbavbatshi, Uye a khadego vbagikhalotunu nya wufumu kala gupindruga; kholu avo va mwalo lipindru nya guvbindrugedze, kholu kha va thavi Nungungulu.

²⁰Muthu yoyo a di khusa mandza a wugela avo va nga bani vari ni gurula naye; a nyenyezisa gidzumeledzwano gyaye.

²¹Likana laye la gu kwiriga guvbindra mafura, aholu monyo waye wa gu pimisa gu gira nyimbi; magana yaye ma gu tshamba guvbindra wulombe; aholu matshari ma lodzidwego.

²²“Vega womi wago ga PFHUMU Nungungulu, uye a na gu sayisa; gima kha na dzumedzisa muthu nya gululame gu a thega vbavbatshi.”

²³Aholu uwe Nungungulu u ngu va gira va relela phalani nya guete; avo vathu nya sighevenga ni wukanganyisi, kha va na vbohisa vbakari nya matshigu yawe nya guvbanye; aholu eni nya gu tumba uwe!