Read gitonga Dzindzimo 58 Bible Online

Dzindzimo 58 - gitonga bible

Dzindzimo 58

¹Ga muthangeli nya tsawa nya vaembeleli. Khu maembelo nya ndzimo yi gu, khiyo: “U nga pfhungumuli.” Ndzimo ya Dhavhidhe Enu vafumeli, ina khu lisine mu ngu lamula khu gululama, gani? Mu ngu lamula milandru ya vatshavbo khu fanelo yi vbwetegago, gani?

²Malipha! Enu mwa gu alakanya guvivba basi, thumo wanu khu gu wusa dzinyimbi tigoni.

³Va nya guvivba va gu ghoheka va ngari ndrani, va nya malipha va dzimede va si gu velegwi.

⁴Va na ni wuhungu nga dzinyoga; va fanana ni nyoga yi dzi girago givbwiri, yi tshika dzindzeve,

⁵gasi gumba pwa litembo ambari gu yingisa lito la wule a girago masalamuso.

⁶Nungungulu, gulela magwaha yawe, u hatshulela sihaya nya singhalana sesi, PFHUMU Nungungulu!

⁷Va na mwalalege kha nga mati nya guvbalage; va gu khwandra sighalala sawe, si na fanyegele.

⁸Va na nyivilige kha nga khudzu yi tshiyago heha basi; kha nga gyanana nya mimba nya guhamuge, va nafe nyamba wona wenengedzo nya lidambo.

⁹Dzikhali dzawe dzi na vidziswe khu dzikhuni nya gunagane; ni edzi nya gubange, nyama yi si gu vidzwi yi na dzudzugwe hwindzo khu gipupwane.

¹⁰Muthu nya gululame a na nengela a gu wona na va gu phodzedwa va nya guvivba; a na hamba migondro novbani gwawe.

¹¹Vatshavbo va na, khavo: “Bayi furi! Muthu nya gululame a ngu tshatshazedwa! Khu lisine, womo Nungungulu a lamulago litigo!”