Read gitonga Dzindzimo 66 Bible Online

Dzindzimo 66 - gitonga bible

Dzindzimo 66

¹Ga muthangeli nya tsawa nya vaembeleli. Ndzimo ni gizimba Wombani mikulungwane nya gutsake mu dhumisa Nungungulu, enu vathu nya mayigo yatshavbo.

²Embani dzindzimo nya gukhusedze lina laye, yeyedzani githawo khu gu mu dhumisa!

³Embelani esi Nungungulu, khenu: “Sigiro sago si ngu samadzisa ngudzu! Valala vago va gu ndrendremela mbeli gwago, kholu tshivba yago yikhongolo.

⁴Vathu vatshavbo va tigoni va ngu gu khozela, va emba dzindzimo nya gurungudze lina lago.”

⁵Deluni muta wona mithumo ya Nungungulu; wonani silo nya gusamadzise a giredego vathu.

⁶ Vbindrugedzide yiphwa yi khala litigo nya gubange, va di tshatuga tsongo khu mawundru. Hi na nengele avbo gwaye.

⁷A gu fuma khu tshivba yaye kala gupindruga, gikhati gyatshavbo a gu khedzisela vathu va tigoni, gasi avo nyambana githawo va si dzi khusedzi.

⁸Enu va nya mayigo, bongani Nungungulu wathu; gu na pwale lito la avo va mu dhumisago;

⁹uye a vbanyisago mihefemulo yathu; kha dzumela gukhuye migondro yathu yi tshunganela.

¹⁰Kholu uwe Nungungulu u hi lingide, u hi agisa kha nga idzo yi agiswago khidzo parata.

¹¹U hi digide hi modwa khu naphwi; u hi rwegide rwalo nya gulemele ngudzu;

¹²u hi ningede hi gandredzedwa khu valala vathu; u hi vbindrisa khu niloni ni matini, olu, khu guhegisa u hi duside, u hi vbohisa tigoni nya ladi, nya gukhadzisege.

¹³Nyi na bela Nyumbani gwago nyi gu ninga mhamba nya phaso nya guvbiswe; nyi na tadzisa kharati gisambanyo nyi giridego.

¹⁴Situmbiso nyi giridego khu likana langu, avbo nyi nga bani nyiri sigaradzoni.

¹⁵Nyi na hatha sifuyo nya gunone, dzimombe, dzinvuta, dziphongo; nyi ta gu girela mhamba nya miphaso nya guvbiswe, nya mahema nya gunungele.

¹⁶Deluni enu mwatshavbo mu gu ni githawo ga Nungungulu, deluni mu ta nyi yingisa nyi na mi embeledzela mithumo a nyi giredego.

¹⁷Eni nyi di mu rungudza khu dzindzimo nyi mu rana nyi lomba guphaswa.

¹⁸Naripwani nyi di alakanya guvivba monyoni gwangu, Pfhumu gima na sa nyi yingisa.

¹⁹Aholu, Nungungulu a nyi yingiside ni gu hakha lito nya nombelo wangu.

²⁰A na bongwe Nungungulu, kholu a ngamba bomba gu hakha nombelo wangu, gambe kha bomba gu nyi ninga wuhigo waye.