Read gitonga Dzindzimo 68 Bible Online

Dzindzimo 68 - gitonga bible

Dzindzimo 68

¹Ga muthangeli nya tsawa nya vaembeleli. Gizimba gya Dhavhidhe. Ndzimo Nungungulu a gu khuga; va gu phalalega valala vaye; avo va mu nyenyago, va gu thava va tutuma mbeli gwaye.

²Uwe wa gu va phalalegisa kha nga wutshi; wu mwalalegago ndrengelengeni. Va nya guvivba va gu mbemba mbeli gwago va nyiviliga kha nga mafura vbanilotunu.

³Aholu va nya gululama va ngu nengela ngudzu, va ngu hana mbeli ga Nungungulu khu gutsaka.

⁴Embani ga Nungungulu, mu dhumisa lina laye khu dzindzimo; tulelani ndzila oyu a khiledego vbatshani nya mapfhi. Lina laye khu PFHUMU Nungungulu, nengelani mahoni gwaye.

⁵Nungungulu a vbanyago nyumbani gwaye nya guage, khuye babe nya dzikhulungu ni muvhikeli nya dzinoni.

⁶Nungungulu a ngu ninga wulanga sisiwana, a tshula ava va hungeledwego, a va ninga wurendra; aholu avo va mu wugelago va na vbanya giwulani.

⁷Uwe Nungungulu, litshigu u dugidego ni vathu vago, u tsemakanya navo giwula,

⁸litigo li di kutsungwa; ndzadzini gu di tulega guwa ndzadzi mbeli gwago, Gigomo gya Sinayi gi di ndrendremela mbeli gwago, uwe Nungungulu wa Israyeli.[3]

⁹Uwe Nungungulu, u wiside ndzadzi nya yingi; u wusedza litigo lago li nga bani li vbede tshivba.

¹⁰Vathu vago va vbahide tigoni momo dzindranga dzawe; uwe Nungungulu khu wuhindzi wago, u ningide sisiwana esi si vbwetegago.

¹¹Pfhumu a ningede lito, vanyamayi nya vangi va di huwelela, khavo:

¹²“Vafumeli ni mabutho yawe, ndrivale, va ngu tutuma va gu thava!” Gaya, vanyamayi va di ya kabanelana silo nya guphangwe ga valala.

¹³Sifananiso nya matuva ni mambapi nya parata, ni mitenga yakone nya gukhedzige nga ndralama. Khu ginani vambe va varamago phandroni nya dzinvuta litshigu nya gudwane nyimbi?

¹⁴Gikhati Nungungulu nya Tshivba Yatshavbo, a padego vafumeli, a va phalalegisa gu di thega hunguva gigomoni gya Salimoni.

¹⁵Gigomo gya Nungungulu khu Bhasani, gigomo nya gulaphe ni sigomwana nya gutale gigomo gya Bhasani.

¹⁶Enu sigomo nya gulaphe ngudzu, khu ginani mu girela lidiwo gigomo Nungungulu a gi hathidego gasi gu vbanyela umo? PFHUMU Nungungulu a na vbanya umo kala gupindruga.

¹⁷Nungungulu khugide khu gigomoni gya Sinayi, nari ni mazanazana nya dzikareta nya nyimbi, aya bela makhuvini nya Nyumba yaye nya guage.

¹⁸ Uwe u gwede gigomoni nya gulaphe, u dzegide sibotshwa nya singi; u hakhide miningelo ga vathu, ni ava va gu wugelago navo va reside miningelo yawe, PFHUMU Nungungulu a na vbanya vbakari gwawe.

¹⁹A na rungudzwe Pfhumu, muvbanyisi wathu, a dzegago mirwalo yathu litshigu ni litshigu.

²⁰Nungungulu wathu, Nungungulu a vbanyisago; PFHUMU Nungungulu a ngu hi tshula wugumbini nya lufu.

²¹Nungungulu a na pfara mihungo ya valala vaye, mihungo ya vale va simamago gu ghoha.

²²Pfhumu ganede, khuye: “Nyi na bweledza valala vanu khu tigoni ga Bhasani, nyi na va bweledza, guetani nya linene.

²³Mu na hamba migondro yanu novbani wa valala vanu, dzimbwa dzanu dzi na dandzela novba wawe.”

²⁴Uwe Nungungulu, vatshavbo va ngu wona magimbilelo yago, magimbilelo ya Nungungulu, Mufumeli wangu na gubela nyumbani gwaye nya guage.

²⁵Vaembeleli nya dzindzimo va thangide mbeli, khu hwane va landrela vawombi nya sitendre, khu vbakari si fode sagadzyana nya makendzi, na si gu womba mitandrandra.

²⁶Enu mwatshavbo rungudzani Nungungulu, Tshangano watshavbo wa Israyeli rungudzani PFHUMU Nungungulu.

²⁷Mbeli gu thangide Bhejami, nyumba nya yidugwane ga Israyeli, gu landrela dzindruna dza Judha ni gikwata gyawe, khu hwane guta dzindruna dza Zebhuloni ni dza Nafitali.

²⁸Yeyedza tshivba yago Nungungulu, tshivba yile u yi thumisago gu hi phasedzela khiyo.

²⁹Gukhugela Nyumbani gwago ya Jerusalema, iyo va tago vafumeli vata gu luva khu miningelo.

³⁰Kawuka Egipito a fumago mayigo, a khalago kha nga girengo gya khabini kala vatshavbo vata khoza gwago va gu luva; khu mitshambi nya dzimombe, simombyana na si lemedwe khu parata. Phalalegisa mayigo ma golago gu wusa dzinyimbi.

³¹Khu Egipito dzi nata dzindruna; Vaetiyopi va na khozela Nungungulu na va khusedzide mandza.

³²Enu mifumo ya tigoni, embani dzindzimo ga Nungungulu, zundzani Pfhumu khu dzindzimo.

³³Uye a guromo khu gale vbatshani ndzadzini; yingisani, uye a ngu pwadza lito laye, a gu lito nya tshivba.

³⁴Tivisani vathu gukhenu Nungungulu a na ni tshivba; wugulu waye wu ngu fenengedza Israyeli, a gu fuma nari khu vbatshani ndzadzini.

³⁵Uwe Nungungulu u ngu samadzisa nu khade nyumbani gwago nya guage; Nungungulu wa Israyeli, a ngu ninga tshivba ni wufumu vathu vaye. A na rungudzwe Nungungulu!