Read gitonga Dzindzimo 69 Bible Online

Dzindzimo 69 - gitonga bible

Dzindzimo 69

¹Ga muthangeli nya tsawa nya vaembeleli khu ndzimo yi gu, khiyo: “Senge.” Ndzimo ya Dhavhidhe Uwe Nungungulu nyi vbulugise, kholu nyi ngu vbweta gu langaladzwa khu mati.

²Nyi ngu dzama phalani nya maraga, gu mwalo ni wulanga nya gugandre; nyi rinyidwe nandwani nya mati nya guete, mati ma ngu nyi langaladza nyi ngu ndrindrwa khu mwedzi.

³Nyi garade khu gu lila, ngolo wangu wu bangide; maho yangu ma vbede tshivba khu gu khevisela Nungungulu wangu.

⁴ Avo va nyi vengelago, nyambana nandru, vangi ngudzu guvbindra ndzudzu wa hungoni gwangu; vambembisi vangu va na ni tshivba ngudzu, vale va dzi girago valala vangu nyambana fanelo; va gu nyi singedza malipha, va nyi gurumedza gu bweledza iso nyi ngamba ba.

⁵Uwe Nungungulu u ngu wuti gwadi wupumbu wangu, ni sihoso sangu kha si gu sihaleli.

⁶Avo va tumbago uwe va nga khali dzitshoni khu kotani gwangu, uwe PFHUMU Nungungulu nya Tshivba Yatshavbo; ambari vale va gu vbwetago, va nga tandregi khu mahungu yangu, uwe Nungungulu wa Israyeli.

⁷Khu kotani nya lihaladzo nyi gu nalo khu uwe, nyi ngu vadwa, khovbe yangu yi fenengedzwa khu dzitshoni.

⁸Nyi khade nombo ga vandriyangu nyamba tidwa khu sanana sa mayi wangu.

⁹ Khu lihaladzo nyi gu nalo khu nyumba yago, ndrani gwangu gu ngu vbya khu nilo, avo va gu valago va gu vala eni.

¹⁰Kholu ambari nyi lila ni gu hala, isoso si ngu nyi wusela gihegiso.

¹¹Ambari nyi ambala saku nyi khade gyombo nya gihegiso gwawe.

¹²Va gu ganela khu enu dzinyangwani nya lidhoropa, vamaleveni va gu nyi hega, va nyi poyila.

¹³Gasi eni, PFHUMU Nungungulu, nya guta gwago khu nombelo; nyi hakhe uwe Nungungulu khu wuhigo wago nya wukhongolo; nyi vbulugise kha nga u nyi tumbisidego,

¹⁴nyi vbulugise maragani, gasi nyi si dzami; nyi vbulugise ga avo va nyi vengago, u nyi nula guetani nya mati.

¹⁵Nyi nga ndrindrwi khu mati nya nondrwa, u nga nyi digi nyi midzwa khu liphala nya guete, u nga dzumeli gukhuwe likana nya nambo li segega vbatshani gwangu.

¹⁶Uwe PFHUMU Nungungulu, nyi hakhe, kholu lihaladzo lago khyadi ngudzu; nyi wone khu wuwadi wago nya wungi.

¹⁷U nga siheli khovbe yago eni githumi gyago, kholu nyi vbede tshivba; nyi hakhe khu guvbiredza.

¹⁸Hidzimela vbafuvbi gwangu u nyi vbulugisa mandzani ga valala vangu.

¹⁹Uwe u ngu dziti gukhuwe nyi ngu vadwa, u nguti gambe ni dzitshoni nyi thedwago; valala vangu vatshavbo u ngu vati.

²⁰Va nyi vade kala ni monyo wangu wu vbisa, nyi vbela tshivba; nyi vbwetide nya gu nyi pwele wusiwana, aholu kha nya mu mana; kha nya mana ni moyo nya gu nyi tangadzise.

²¹ Va nyi thelede guhodza nya guthedwe wuhungu nya gusonge, na nyi gupwa lidora va nyi ninga ginageri.

²²Guhodza gwawe gu na vbindrugedze gu khala naphwi avbo gwawe, gu songa gumogo ni livelego lawe.

²³ Ma na pfhupele maho yawe, gasi ma si woni; mihwambo yawe yi na ndrendremele gikhati gyatshavbo.

²⁴Va na fenengedzwe khu likhulo lago, va na vbohedwe khu likhulo lago nya guvbise.

²⁵ Lizumboni gwawe gu na khale giwula, gambe gu nga manegi ni moyo nya guvbanye mitshatshani gwawe.

²⁶Kholu va gu tshanisa muthu u mu bayisidego, va engedzela wuvi wa oyu u mu tsayisidego.

²⁷Va engedzele milandru yawe, u nga va dzumedzisi va mana gu tsetseledwa.

²⁸ Va fute libhukuni gwago nya womi u nga va pati tengoni ga va nya gululama.

²⁹Gasi eni nyi vbisegago ni gutshaniseka, nyi wuse u nyi vbanyisa, uwe Nungungulu u gu wuthavelo wangu.

³⁰Nyi na embelela nyi dhumisa lina la Nungungulu khu dzindzimo, nyi mu khusedza khu ndzimo nya gubonge.

³¹Khiso esi si na gu tsakisago PFHUMU Nungungulu, guvbindra dzimhamba nya dzikuzi ni simombyana si gu ni dzikheho ni samba.

³²Avo va sanisekago va na si wone va nengela khiso; gasi enu mu vbwetago Nungungulu, myonyo yanu yi na tsake

³³kholu PFHUMU Nungungulu a ngu yingisa dzikhulungu kha divali vale va tshaniswago mapasoni.

³⁴Enu ndzadzini ni mafuni, dhumisani Nungungulu, yiphwa ni satshavbo si vbanyago umo.

³⁵Kholu, Nungungulu a na vbanyisa Siyoni, a vbahedza madhoropa ya Judha, va na khala umo va bwelo khavbo va ma fuma.

³⁶Ni livelego la sithumi saye, li na khala thomba yawe, kholu, avo va mu golago va na vbaha umomo.