Read gitonga Dzindzimo 74 Bible Online

Dzindzimo 74 - gitonga bible

Dzindzimo 74

¹Ndzimo nya sileletelo sa Asafi Uwe Nungungulu, khu ginani u hi digelago muphelo? Khu ginani u wuselago likhulo dzinvuta nya tshambi wago?

²Dundruga vathu vago, avo u va hathidego khu gale, u va tshudzisidego gasi va khala lihundzu nya thomba yago; alakanya gigomo gya Siyoni, u khalago avbo.

³Delu u ta wona marumbi yaya nyamba hegisa, valala va khungumulede satshavbo si nga bani siri nyumbani gwago nya miphaso.

⁴Valala va di ghiya, va embelela, va tsaka nyumbani gwago nya miphaso. Va di ghwimba umo dzingavbya dzawe, va yeyedza gupala.

⁵Va gu gira kha nga vakoki nya dzikhuni va khusedzago sibhewula sawe, gasi gu koka misimbo khabini.

⁶Va di khungumulela khu sibhewula ni sighomba, sombo satshavbo nya guvatwe.

⁷Va rothide nilo nyumbani gwago nya miphaso; va gu nyenyezisa, va thesa vbavbatshi nyumba nya lina lago.

⁸Khu myonyoni gwawe va di ganela, khavo: “Hongoleni hi va fuvise khu gumogo basi.” Va di vbisa malanga yatshavbo nya gukhozele umo Nungungulu tigoni gwathu.

⁹Olu kha hi woni gambe siliwugiso; gu mwalo gambe vaprofeti, kha hi dziti gukhethu kala lini.

¹⁰Ama Nungungulu, valala vathu va na hi poyila kala lini? Ina avo va na simama gu vala lina lago gikhati gyatshavbo, gani?

¹¹Khu ginani u dusago gyandza gyago gya nyamudye? Khu ginani u khumbaranago mawogo?

¹²Uwe Nungungulu, Mufumeli wangu gukhugela matshigu ya gale; khuye a hi vbanyisago omu tigoni.

¹³ Uwe u kabaniside yiphwa khu tshivba yago, u pfarela mihungo nya sirengo nya sikhongolo sa linene.

¹⁴U vbadzulede mihungo ya mwamilambo (Levhiyatane), u ningela givili gyaye gi hodzwa khu sirengo sa giwulani.[4]

¹⁵Uwe u tude sifefe ni mitsongo, u bangisa mitsongo nya yikhongolo.

¹⁶Wutshigu ni mihani sa gu lumba uwe, u vegedzela malangani yawe: Lidambo, ngima ni dzinyeledzi.

¹⁷U vegide mivbingano nya litigo, u gu gira maronga ni girame.

¹⁸PFHUMU Nungungulu, dziti gukhuwe valala vago va ngu gu vala, vathu nya sipumbu va ngu ganela guvivba khu lina lago.

¹⁹U nga ningeli ga givaga hefemulo nya lituva lago, ambari gu divala muphelo mihefemulo ya vathu vago va tshanisekago.

²⁰Alakanya pwanano u giridego, kholu womo wughevenga malangani gwatshavbo nya gidema tigoni.

²¹U nga digi oyu a saniswago a khala dzitshoni, mutshaniseki ni muhamugi, va na dhumise lina lago.

²²Wuga, uwe Nungungulu, u dwanela fanelo yago, dundruga idzo gipumbu gi gu valago khidzo gikhati gyatshavbo!

²³U nga divali dzihuwa dza valala vago, ni ligwaha va li girago matshigu yatshavbo avo va gu wugelago.