Read gitonga Dzindzimo 76 Bible Online

Dzindzimo 76 - gitonga bible

Dzindzimo 76

¹Ga muthangeli nya tsawa nya vaembeleli khu sitendre. Ndzimo ya Asafi Nungungulu a ngu tidwa gwadi tigoni ga Judha; lina laye li zundzegide tigoni ga Israyeli.

²Nyumba yaye nya miphaso yomo Jerusalema, uye a gu khala gigomoni gya Siyoni.

³Khavbo vbale uye a nga fanyeledzela sighalala nya wulaho, siholoma, sitshangu ni matshari.

⁴Uwe Nungungulu, u zundzegide ngudzu, wudhumo wago wukhongolo guvbindra sigomo nya silo nya guphangwe.

⁵Dzindrena dzawe dzi wandredwe matshari; va nya tshivba kha va dzi kodza gu gira gilo. Olu va lade ligovbe nya mahegiso, yi mwalo ndrena ni mweyo yi nga tshalago, gasi gu thumisa matshari yawe.

⁶Avbo u nga va thusa, uwe Nungungulu wa Jakobe, u di emisa dzikareta ni dzikavalu dzawe.

⁷Uwe wa gu goroga u ngu thisa, khu mani a tiyago gu ema mbeli gwago?

⁸Khu ndzadzini yoyo u tiviside gulamula gwago, litigo li di tsekatseka, li degula,

⁹gikhati Nungungulu a khugidego gasi gu lamula ni gu vbanyisa vatshavbo vale va tshaniswago tigoni.

¹⁰Ambari likhulo nya muthu li na gu rungudza; ni mitshaledwa yi nga vbulugago yi na gu girela buzo.

¹¹Ningani PFHUMU Nungungulu wanu esi mu mu tumbisidego, mayigo yatshavbo ya vbafuvbi, ma na rese miningelo yawe vata yi bikela ga Nungungulu a yelago gu ningwa githawo.

¹²Uye a ngu thesa vbavbatshi tshivba ya sanana sa vafumeli; sa gu dzi gugumugisa; a ngu thela hwanga vafumeli nya litigo.