Read gitonga Dzindzimo 84 Bible Online

Dzindzimo 84 - gitonga bible

Dzindzimo 84

¹Ga muthangeli nya tsawa nya vaembeleli. Khu gatite. Ndzimo ya sanana sa Kore Edzi yi mburidego khidzo nyumba yago nya miphaso, uwe PFHUMU Nungungulu nya Tshivba Yatshavbo!

²Hefemulo wangu wu ngu dogorela ngudzu gu ya bela umo, nyi ngu suva gu ya khala makhuvini nya Nyumba ya PFHUMU Nungungulu; nyi ngu emba khu gutsaka khu monyo wangu watshavbo ga Nungungulu a vbanyago!

³PFHUMU Nungungulu nya Tshivba Yatshavbo, Mufumeli ni Nungungulu wangu! Ambari sidzengane si manide wulanga nyumbani gwago, ni ndrewulewu ya gu vbaha gihaga vbafuvbi ni giluvelo gyago, gasi gi sayisa umo sifondro saye.

⁴Va kategide avo va khalago nyumbani gwago; va na simama gu Gu dhumisa nyamba garala.

⁵Va kategide vale va manago tshivba avbo Gwago, vale va belago ndzilani nya guye gigomoni gwago!

⁶Va gu tsemakanya mikova yi bangidego, ya gu manega na yiri ni sibuga nya mati; ya gu kategiswa khu ndzadzi nya guphele.

⁷Na va gu gimbila, tshivba yawe ya guya na yi gu engedzelana litshigu ni litshigu, kala va gu vboha mbeli ga Nungungulu, gigomoni gya Siyoni, va ta wona khovbe yago.

⁸PFHUMU Nungungulu nya Tshivba Yatshavbo, yingisa nombelo wangu, tula ndzeve u yingise, uwe Nungungulu wa Jakobe!

⁹Uwe Nungungulu muvhikeli wathu, kategisa wule u mu hathidego gu khala mufumeli.

¹⁰Kholu gu khala litshigu limwedo basi nyumbani gwago, gwadi guvbindra gu khala likhumi mazana matshigu vbavbandze. Nyi ngu gola gu khala musayisi nya lidimba Nyumbani gwa Nungungulu wangu, guvbindra gu ya khala mitshatshani ya va nya guvivba.

¹¹Kholu Nungungulu khuye lidambo ni muvhikeli; PFHUMU Nungungulu a ngu ninga wuhigo ni wudhumo; Uye kha bombi gu girela wuwadi vale va girago ndruda.

¹²PFHUMU Nungungulu nya Tshivba Yatshavbo, va kategide avo va tumbago uwe.