Read gitonga Dzindzimo 85 Bible Online

Dzindzimo 85 - gitonga bible

Dzindzimo 85

¹Ga muthangeli nya tsawa nya vaembeleli. Ndzimo ya sanana sa Kore PFHUMU Nungungulu u kategiside litigo lago; u wusedzide guandra ga Jakobe.

²U tsetselede guvivba ga vathu vago, u va divalela sighoho sawe satshavbo.

³U vbedzide khorodza yago yatshavbo, u bosa likhulo lago.

⁴Hi wuyise nyaluphye, uwe Nungungulu muvbanyisi wathu, u nga simami gu hi girela likhulo.

⁵Ina likhulo li na simama kala gupindruga, gani? Likhulo lago li na simama ni ga situgulwana si nga gutago, gani?

⁶Ina khu na nga hi vbanyisa gambe, gasi vathu vago va nengele khu uwe, gani?

⁷PFHUMU Nungungulu, hi yeyedze wuhindzi wago bwelo khavbo u hi vbanyisa!

⁸Nyi na yingisa esi PFHUMU Nungungulu a na ganelago, kholu a na ganela khu mahungu nya gurule ga vathu vaye, ni ga vale va khodwago gwaye; gasi va si wuyeleli gambe wupumbuni.

⁹Guvbanyisa gwaye gomo vbafuvbi ga vale va mu thavago gasi wudhumo wu vbaha tigoni gwathu.

¹⁰Wuhigo ni lisine si di tshangana, gululama ni gurula si di losana.

¹¹Lisine li na buga mafuni, gululama gu na tshiga khu ndzadzini

¹²Uye PFHUMU Nungungulu a na hi ninga makategwa, litigo lathu li na ninga mihandro yaye.

¹³Gululama gu na thanga mbeli ga Nungungulu, avbo a gandrago avbo, ya gu tulega ndzila.