Read gitonga Dzindzimo 88 Bible Online

Dzindzimo 88 - gitonga bible

Dzindzimo 88

¹Ndzimo ya sanana sa Kore. Ga muthangeli nya tsawa nya vaembeleli, madwalini. Ndzimo nya sileletelo sa Hemani wa Ezira PFHUMU Nungungulu ni muvbanyisi wangu, wutshigu ni mihani nyi ngu lila avbo gwago.

²Hakha nombelo wangu, yingisa gulila gwangu.

³Kholu hefemulo wangu wu garade khu gutshaniseka, nyi womo vbafuvbi ni gufa.

⁴Nya gu sayedwa tengoni nya vafi, kholu nyi vbede tshivba.

⁵Nyi tshidwe vbakari nya vafi, khwatshi khu avo va nga songwa vbakari nya litunga, va keledwego, hi si va alakanyigo gambe, kholu va dusidwe mandzani gwago.

⁶U nyi rinyide guetani nya lithowo, phalani nya guete nya guthise.

⁷Likhulo lago li ngu nyi lemela, ni mavimbi yago yatshavbo ma ngu nyi fenengedza.

⁸U nyi hambaniside ni dzipari dzangu, u nyi gira muthu nya gunyenyeze mahoni gwawe; nyi khothedwe kha nga gibotshwa nyi ngu sindra guduga.

⁹Maho yangu ma garade khu gu lila; matshigu yatshavbo nya gu lombelela gwago, na nyi gu khusedza mandza.

¹⁰Ina u na gira siliwugiso sago, u girela avo va fudego, gani? Ina, vafi va na dzi kodza guwuga, va gu dhumisa, gani?

¹¹Ina va na ganela khu lihaladzo lago avo va ladego thowoni, gani? Mwendro gu tivisa lisine lago ga avo va guromo phalani nya vafi, gani?

¹²Gululama ni siliwugiso sago, si na dzi wonegisa gusivbalani nya lufu, gani? Umo silo satshavbo si divadwago, gani?

¹³Aholu, eni nya gu lila gwago, PFHUMU Nungungulu, dzimindrudzile, nya gu khusedza nombelo wangu nyi wu yisa iyo gwago.

¹⁴Khu ginani u nyi nyenyago, PFHUMU Nungungulu? Khu ginani u nyi sihelago khovbe yago?

¹⁵Gukhugela wananani gwangu nyi wa gu hodza tshanisa; ni gu holela lufu vbafuvbi, u ngu nyi wonisa sigaradzo nya guthise, olu si ngu nyi vbedza tshivba.

¹⁶Likhulo lago li ngu nyi lemela, mavetelo yago ma ngu nyi rerekisa.

¹⁷Likhulo lago la gu nyi talela kha nga mati matshigu yatshavbo.

¹⁸U nyi hambaniside ni dzipari ni vaakelane vangu; olu nyi tshade ni gidema basi.