Read gitonga Dzindzimo 89 Bible Online

Dzindzimo 89 - gitonga bible

Dzindzimo 89

¹Ndzimo nya sileletelo sa Etani, wa Ezira Oh PFHUMU Nungungulu, nyi na embelela lihaladzo lago kala gupindruga; gikhati gyatshavbo nyi na tivisa gutumbega gwago ga mimelana yatshavbo.

²Nyi di huwelela kheni lihaladzo lago li ngu simama kala gupindruga; gutumbega gwago gu mwalo mahegiso kha nga ndzadzini.

³Uwe u di khuwe: Nyi giride gidzumeledzwano ni gihathwa gyangu, nyi sambanya ga Dhavhidhe, githumi gyangu, kheni:

⁴ “Nyi na tiyisa melego wago kala gupindruga nyi na pharisa ndronga nya wufumu situgulwana sago.”

⁵PFHUMU Nungungulu, sivangwa satshavbo sa ndzadzini si na dhumise sisamadziso sago, si embelela gutumbega gwago tshanganoni nya sihathwa.

⁶Kholu khu mani a guromo ndzadzini nya gufanane ni PFHUMU Nungungulu? Vbakari nya sivangwa sa ndzadzini, khu mani a fananago ni PFHUMU Nungungulu?

⁷Khu lisine Nungungulu a ngu thavisega tshanganoni nya sihathwa; a ngu thavisega guvbindra sivangwa satshavbo si mu randredego.

⁸PFHUMU Nungungulu nya Tshivba Yatshavbo, khu mani a gu ni tshivba kha nga uwe PFHUMU Nungungulu? Tshivba ni gu tumbega gwago si gu randrede.

⁹ Khuwe u fumelago tshivba nya linene; u rudzisa tshivba nya mavimbi ma gu gugumuga.

¹⁰U gandredzede Rahabhi, [7] nyoga nya yikhongolo ya linene u yi songa, khu gyandza gyago nya tshivba u phalalegiside valala vago. [8]

¹¹Ndzadzi ni mafu sa gu lumba uwe, u giride litigo ni satshavbo si guromo umo.

¹²Uwe u giride Wuronga ni Marandzi; sigomo sa Tabhori ni Herimoni si ngu womba mikulungwane si dhumisa lina lago.

¹³U na ni libogo li tiyidego mandza yago ma na ni tshivba, wa gu khusedza libogo lago la nyamudye wa gu pala.

¹⁴Wufumu wago wu tiyisidwe khu gululama ni lisine, lihaladzo ni gutumbega somo mbeli gwago.

¹⁵Va kategide vathu va gu khozelago khu lisine gu wombela mikulungwane, va vbanyago mbeli ga PFHUMU Nungungulu, gungangamelani nya khovbe yaye.

¹⁶Matshigu yatshavbo va gu nengela khu kotani yago, va nengela khu gululama gwago,

¹⁷kholu uwe khuwe wuzundzo nya tshivba yaye, khu wuhindzi wago u ngu khusedza tshivba yathu.

¹⁸Kholu gitshangu nya gu hi vhikele gyomo mandzani ga PFHUMU Nungungulu, ni mufumeli wathu a gu lumba oyu a Agidego wa Israyeli!

¹⁹Gale u ganede khu ndroro ga sithumi sago nya gukatege, khuwe: Nyi ningide tshivba ndrena mweyo, nyi fumiside lidzaha nyi nga li hathago vbakari nya vathu vangu.

²⁰ Nyi mane githumi gyangu Dhavhidhe; nyi mu todzide hungoni khu mafura yangu nya gukatege.

²¹Nyi na vega gwaye tshivba yangu, nyi na mu tiyisa khu libogo langu.

²²Valala vaye gima kha va na mu wugela, ni va nya guvivba gima kha va na mu pala.

²³Nyi na tshigira valala vaye na gu va wona, nyi songa vatshavbo va mu vengago.

²⁴Nyi na tiyisa gwaye gutumbega ni lihaladzo langu; khu lina langu nyi na dandrisa mufumo waye.

²⁵Nyi na andrisa wufumu waye kala vbatshani nya yiphwa, ni libogo laye la nyamudye kala vbatshani nya mitsongo.

²⁶Uye a na nyi embela, khuye: “Uwe u babe wangu, u Nungungulu wangu, u muvhikeli ni muvbanyisi wangu.”

²⁷ Eni nyi na mu phara kha nga gyanana gyangu nya matiwula, nyi mu khusedza vbatshani ga vafumeli nya litigo.

²⁸Lihaladzo langu li na simama gwaye, ni gidzumeledzwano gyangu naye gi na tiya kala gupindruga.

²⁹Lihundzu lawe li na simama kala gupindruga, mufumo waye wu tiya kha nga ndzadzini.

³⁰Aholu, sanana sago sa gumba landra milayo yangu, sa gu diga gu landrisa sileletelo sangu,

³¹sa gu yeyisa milayo yangu, si si giri gugola gwangu,

³²nyi na tsayisa guyeyisa ni guvivba gwawe khu lipitso;

³³ambari ulo nyi na sayisa lihaladzo langu ga Dhavhidhe, gutumbega gwangu gu na simama gwawe.

³⁴Kha nyi na funya pwanano wangu, mwendro gu vbindrugedza mahungu nyi ganedego khu kanani gwangu.

³⁵Nyi sambanyide gwawe khu guaga gwangu, kheni gima kha nyi na liphela Dhavhidhe.

³⁶Situgulwana saye si na vbanya kala gupindruga, gikhalo nya wufumu waye gi na simama mbeli gwangu kha nga lidambo,

³⁷gi na tiya kha nga ngima kala gupindruga, a gu fakazi nya gutumbege vbatshani damboni!

³⁸Aholu uwe u digide gihathwa gyago, u gi nyenya u gi reda phuvbo!

³⁹U fanyide pwanano u hungidego ni githumi gyago; u nyenyeziside gihugu gyaye u gi rinya vbavbatshi.

⁴⁰U thesede mabhiyo yawe yatshavbo, ni makhokhola yawe u ma giride marumbi!

⁴¹Vatshavbo vavbindri nya ndzila va gu bela va phanga iso va sinago; khade givalo ga vaakelane vaye.

⁴²U khusedzide libogo la nyamudye la valala vaye, u nengedzisa valala vaye vatshavbo.

⁴³U lambiside matshari yaye, u mu diga a padwa nyimbitunu.

⁴⁴U tshipiside wudhumo waye, u thesa vbavbatshi gikhalo gyaye nya wufumu.

⁴⁵U mu vbungulede myaga yaye nya guvbanye, u wuya u mu thela dzitshoni.

⁴⁶Uwe PFHUMU Nungungulu, ina u na hi sihalela kala gupindruga, gani? Likhulo li khondra gikhati gyatshavbo kha nga nilo, gani?

⁴⁷Dundruga gukhuwe womi wangu wu rode, muthu u mu wumbidego kha vbanyi matshigu nya gulaphe.

⁴⁸Ina khu mani a na gu vbanyago, nyamba fa? Mwalo muthu a dzi kodzago guya tshula hefemulo waye tshivbani nya gufe.

⁴⁹Pfhumu, lomo hayini lihaladzo lago nya guphele, eli u sambanyidego ga Dhavhidhe khu gutumbega gwago.

⁵⁰Pfhumu, alakanya gukhuwe eni githumi gyago nyi ngu vadwa ngudzu, nyi ngu rwala khanani gwangu givalo nya mayigo nya mangi.

⁵¹Uwe PFHUMU Nungungulu, valala vago va ngu vala mufumeli wago, u mu todzidego mafura yago nya guage, ni evbini a hongolago va gu mu vala.

⁵²A na rungudzwe PFHUMU Nungungulu kala gupindruga! Amen ni Amen.