Read gitonga Dzindzimo 91 Bible Online

Dzindzimo 91 - gitonga bible

Dzindzimo 91

¹Muthu wule a thavelago ga PFHUMU Nungungulu a guromo vbatshani ngudzu, a hefemulago mutsani ga mune nya Tshivba Yatshavbo,

²a na rungudza PFHUMU Nungungulu, khuye: Uwe Nungungulu wangu, u wuthavelo wangu, u likhokhola langu, U Nungungulu wangu nya gu gutumbe.

³Kholu uye a na gu vbulugisa gu modwa khu lizinga li dembidwego mbeli gwago, ni mitungu nya dzimhango dzi vbedzago vathu.

⁴A na gu fenengedza a gu vhikela, u na mana gu sayisega vbavbatshi nya dzimbapi dzaye; gutumbega gwaye gitshangu gyago.

⁵U nga khali hwanga khu gu thisa nya wutshigu, mwendro khu gighalala gi nga khwandrwa vbakari nya mihani,

⁶ambari khu tungu wu phalalegago gidemani, mwendro madwali ma songago vbamihanitunu.

⁷Ambari gu thega bambe gwago, likhumi mazana (1.000); mwendro gu thega likhumi magumi mazana (10.000) nyamudye gwago, gambe uwe khu na thegedwa khu libango lolo.

⁸U na khedza basi khu maho yago, u wona tsayiso wa va nya guvivba.

⁹Kholu khu lisine, PFHUMU Nungungulu wuthavelo wangu. U dzi hathede wulanga ga oyu a Khusegidego ngudzu.

¹⁰Li mwalo libango li na gu gudugelelago, ni madwali kha ma na bela ndrangani gwago.

¹¹ Kholu Uye a na rumela dzingilozi dzaye, dzi gu sayisa ni evbini u na belago khavbo.

¹² Idzo dzi na gu phara khu mandza, gasi ngondro wago wu si kungwi khu giwindri.

¹³ U na gimbila khu vbatshani nya nghala ni mamba, u gandredzela singhalana ni dzinyoga.

¹⁴Kholu PFHUMU Nungungulu wari, khuye: “Kha nga olu a nyi golago, Nyi na mu tshudzisa nyi mu sayisa khu lihaladzo, kholu a ngu liti lina langu.

¹⁵A gu nyi rana, eni nyi na mu phindrula, gusanisekani gwaye nyi na bani nyiri naye, nyi na mu vbanyisa nyi mu ninga wuzundzo.

¹⁶Nyi na mu engedzela matshigu nya guvbanye, nyi mu yeyedza guvbanyisa gwangu.”