Read gitonga Dzindzimo 94 Bible Online

Dzindzimo 94 - gitonga bible

Dzindzimo 94

¹Uwe PFHUMU Nungungulu nya gutsayise, dzi nonedze uwe Nungungulu nya guphodzele.

²Uwe u gu mulamuli nya litigo; khuga u ninga va nya matshandza tshatshazelo va fanedego gu yi hakha!

³Kala lini PFHUMU Nungungulu va na tsakago va nya guvivba? Va na ghiya kala lini va nya guvivba?

⁴Vatshavbo va girago guvivba va gu dzi khusedza, va dzi gira matshandza khu wughevenga wawe.

⁵Avo va gu sasela vathu vago PFHUMU Nungungulu, va gu sanisa thomba yago!

⁶Va gu songa valuveli; va songa dzi noni ni dzikhulungu.

⁷Vari, khavo: “PFHUMU Nungungulu kha si woni; Nungungulu wa Jakobe kha theli kota khiso.”

⁸Enu sipumbu pimisani gwadi, anenu maphuphulu, lini mu na gengelago?

⁹Ina oyu a nga gira dzindzeve, a na sindrwa gupwa, gani? Oyu a nga girago maho, a na padwa gu wona, gani?

¹⁰Oyu a layago mayigo yatshavbo, ina kha na nga tsayisa, gani? Oyu a kavedzelago vathu guti ni gugengela, kha na nga siti, gani?

¹¹ PFHUMU Nungungulu a ngu mati mapimo nya vathu a ngu dziti gukhuye kha ma phasi gilo.

¹²PFHUMU Nungungulu, kategide muthu u mu layago, oyu u mu hevbudzago nayo wago.

¹³Gasi a rule monyo, ma gu vboha matshigu nya sigaradzo, kala li gu kembwa liphala, nya gurinywe umo va nya guvivba.

¹⁴Kholu PFHUMU Nungungulu kha na diga vathu vaye, ambari gu diga thomba yaye.

¹⁵Aholu gulamula gu na girwa gambe khu nayo, avo va agidego myonyo va na gu landrela.

¹⁶Khu mani a na khugago a nyi emela ga va nya guvivba ni sighevenga? Ni gu nyi phasa mandzani ga sighohi?

¹⁷Naripwani PFHUMU Nungungulu kha nga nyi phasa, olu, hefemulo wangu na wu relede tsadegoni nya vafi.

¹⁸Avbo nyi gukheni: “Migondro yangu yi ngu kwiriga wuhindzi wago PFHUMU Nungungulu, wu ngu ta nyi seketela.”

¹⁹Vbakari nya sigaradzo si tadego monyoni gwangu, uwe, U ngu tangadzisa hefemulo wangu.

²⁰Ina Uwe u ngu dzi kodza gu khala pari ya valamuli nya guvivbe, gani? Kholu avo va gu dzega guwegela va gu gira nayo.

²¹Avo va gu luga gikungo nya guwugele muthu nya gululame va kona wule a gu mwalo nandru.

²²Aholu PFHUMU Nungungulu, khuye wuthavelo wangu Nungungulu wangu khuye giwindri nya gutiye gi nyi vhikelago.

²³Va nya guvivba va na mbembiswa khu sighoho sawe, va wugedwa khu mithumo yawe, PFHUMU Nungungulu wathu a na va vbedza kamwe!