Read gitonga Mavingu 11 Bible Online

Mavingu 11 - gitonga bible

Mavingu 11

¹Gikalo nya wudambane manyala ga PFHUMU Nungungulu, aholu Uye a gu nengela khu pimo nya lisine.

²Avbo gu guromo matshandza, dzomo gambe dzitshoni, aholu ga avo va dzi nogisago, gomo guti.

³Gutumbega ga valulamidego gu na va hetedza, aholu manyala ya sighohi, ma gu va mbembisa.

⁴Dzithomba kha dzi gu phasi khu litshigu nya likhulo la Nungungulu, aholu gululama gu ngu guvbulugisa lufuni.

⁵Gululama gwa muthu a tumbegidego, gu na lulamisela ndzila yaye, aholu gighohi gi na thega khu sighoho saye.

⁶Vathu nya gululame va gu vbanyiswa khu mithumo yawe nya gululame, aholu vakanganyisi va na modwa khu manavelo yawe.

⁷A gufa muthu nya guvivbedwe khu monyo, gya gu vbela gitumbo gyaye; ni satshavbo a nga bani na gu si lirela, sa gu luza.

⁸Muthu nya gululame a ngu duswa vbadzimhangotunu, wulangani gwaye gu yiswa gighohi.

⁹Muthu nyambasi wadi, a gu songa muakelane waye khu likana laye, aholu avo va lulamidego va na vbanyiswa khu wugengeli.

¹⁰Va gu andra vathu nya gululame, lidhoropa la gu nengela, gasi a gufa muthu nya guvivbedwe khu monyo, gumanega mikulungwane.

¹¹Khu makategwa ya va nya gululama, lidhoropa la gu khusedzwa, aholu malito ya va nya guvivbedwa khu myonyo, ma ngu li mbembisa.

¹²Uye a nyenyago muthu kwawe gipumbu, aholu uye a gengedego a gu degula saye.

¹³Muthu nya mapongowongo a gu tugudzisa misihalo, aholu uye nya gutumbege, a gu siha misihalo.

¹⁴Khu gu hamugega muthangeli nya mapimo litigo guthega, aholu gwa gu tala madhota, li na vbanyiswa.

¹⁵Uye a dzumelago gu khala fakazi nandruni wa muthu nyamba muti, a na dzi laya, aholu uye a emago hwindzo naso, a na khala gurulani.

¹⁶Nyamayi nya ndruda, a gu mana wuzundzo, aholu vama nya mithumo, va gu mana dzithomba.

¹⁷Muthu nya wadi a gu nengedzisa hefemulo waye, aholu uye nyambasi wadi, a gu pwisa wuvi mili waye.

¹⁸Muthu nyambasi wadi, a gu hakha tshatshazelo nya wudambane, Aholu uye a yalago gululama, a na mana tshatshazelo nya wadi.

¹⁹Avo va tiyidego gululamani, va gu mana guvbanya, aholu vale va gimbilago ndzilani nya guwegele, va gu dzi vangela lufu.

²⁰PFHUMU Nungungulu a gu nyenya va nya myonyo yi vivbidego, aholu a ngu nengedziswa khavo va gimbilago khu ndzila nya gululame.

²¹Muthu nya guvivbedwe khu monyo, gima kha na vbuluga gu mana tsayiso, aholu livelego la va nya gululama, li na vbuluga.

²²Nyamayi nya wumburi nari mwalo mapimo, a gu fanana ni lisindra nya ndralama thonvuni nya khumba.

²³Gitumbo gya va nya gululama gya gu hegisa khu matsenya, aholu gya va nya guvivbedwa khu monyo, gya gu hegisa khu tshanisa.

²⁴Muthu a ningago khu wuhindzi nya wungi, a gu wona thomba yaye na yi gu engedzelana, aholu uye a girago ligungo guvbindra muthu nya gululame, a na vbeledwa khiso.

²⁵Hefemulo wa muthu nya wuhindzi wu na hodza wu eneledwa, ni wule a thawuludzago libogo a ningela, uye nuye a na ningwa.

²⁶Vathu va gu vala wule a sihago tirigu a bomba gu rengisela vathu, aholu makategwa ma guta vbatshani ga wule a yi manago, a va rengisela nyamba hwela.

²⁷Uye a dzi garadzago khu gu vbweta wuwadi, a na tsakedwa khu vathu, aholu uye a tsakelago guvivba, a na tshaniswa khugo.

²⁸Uye a tumbago thomba yaye a na theswa khiyo, aholu avo valulamidego va na nyuga kha nga simbo wu thelago nyenvu.

²⁹Uye a thelago ghudzeghudze ndrangani gwaye, a gu dzi girela gingulu; ni gipumbu gi na khala githumi gya va nya gugengela.

³⁰Handro wa muthu nya gululame, simbo wu ningago womi, muthu a dwanelago mihefemulo, muthu nya guti.

³¹Muthu nya gululame a na mana tshatshazelo waye mafuni momo; ahati va nya guvivbedwa khu monyo ni sighohi va na gira kharini?