Read gitonga Mavingu 14 Bible Online

Mavingu 14 - gitonga bible

Mavingu 14

¹Nyamayi nya guti a ngu dzi vbahela ndranga yaye, aholu gipumbu gya gu yi pfhungumula khu mandza yaye.

²Uye a gimbilago khu ndzila nya gululame a ngu thava PFHUMU Nungungulu, aholu uye a gimbilago khu ndzila nya guwegele, a gu mu nyenya.

³Khanani nya gipumbu, lomo lipitso nya matshandza, aholu khu kanani ga muthu nya guti, gomo gu dzi vhikela.

⁴Avbo gu gu mwalo dzimombe, sisangala sa gu khala maphanga, kholu tshivba nya dzimombe, khiyo yi resago gufuma dzimbewu nya dzingi.

⁵Fakazi nya gutumbege yi mwalo malipha, aholu fakazi nyamba tumbega ya gu resa malipha.

⁶Mutseketseli a gu vbweta guti, aholu kha gu mani; gasi muthu nya mapimo, a gu gu mana khu guvbevbuga.

⁷U nga hengeli ni muthu nya guvivbedwe khu monyo, kholu kanani gwaye ma mwalo magana nya yadi.

⁸Guti gwa muthu nya mapimo gwa gu mu layedza ndzila; gasi wupemi nya gipumbu wa gu mu kanganyisa.

⁹Sipumbu sa gu tsaka khu gighoho, aholu mavbanyelo nya yadi, momo ga vathu nya gululame.

¹⁰Monyo khuwo wabune wu pwago wuvi, aholu gutsaka gwaye mwalo mumbe muthu a gupwago.

¹¹Nyumba ya vathu nya guvivbedwe khu monyo, yi na pfhungumudwa, aholu tshatsha wa vathu nya gululame, wu na tiya.

¹² Yomo ndzila muthu a yi wonago khwatshi yi lulamide, aholu khu guhegisani yi mu yisa gufani.

¹³Muthu a ngu kodza guhega na guvbisega monyoni; aholu mahegiso nya gutsake, guta mhango.

¹⁴Uye nya guvivbedwe khu monyo a na khura khu mavbanyelo yaye, aholu muthu nya gululame a na khura khiso sa monyoni gwaye.

¹⁵Muthu nyambana mapimo a gu dzumeledzela satshavbo, gasi muthu nya mapimo a gu khedza umo a gandrago.

¹⁶Muthu nya mapimo a ngu thava a ndreya whindzo nya gihoso, aholu gipumbu gya gu dzi tumba gi hunisela.

¹⁷Muthu nya gihafane a gu gira silo nya guhandruge, gasi muthu nya mapimo nya guwegele khwa gu nyenywa khu vathu.

¹⁸Tshatshazelo wa vathu nyambana mapimo, khu wupumbu, aholu guti gihugu nya wufumu gya va nya gugengela.

¹⁹Vathu nya guvivbedwe khu myonyo, va gu khidzima mbeli ga vathu nya vadi, ni va nya gihafane va na khidzima mbeli ga muthu nya gululame.

²⁰Gisiwana gya gu nyenywa ambari khu pari yaye, aholu sitetema si na ni dzipari nya dzingi.

²¹Uye a vengago muthu kwawe a gu gira gighoho, gasi wule a pwelago gisiro sisiwana, a na mana makategwa.

²²Avo va lugago makungo nya ugo nya guvivbe, va gu gira gihoso! Aholu lihaladzo ni gutumbega, somo ga avo va lulamidego.

²³Thumo watshavbo wu na ni tshatshazelo waye, aholu gu ganela ngudzu basi, gwa gu yisa wusiwanani.

²⁴Gihugu gya va nya guti, khu thomba yawe; aholu wupumbu nya sipumbu, dzitshoni basi.

²⁵Fakazi nya lisine, yi ngu vbanyisa mihefemulo, aholu iyo yi ganelago malipha, mukanganyisi.

²⁶Gu ninga githawo PFHUMU Nungungulu gu na ni tshivba ni gutumba, sanana saye si na mana wulanga nya guthavele umo.

²⁷Gu thava PFHUMU Nungungulu nambo nya womi, gu ndreyisa muthu mazingani nya lufu.

²⁸Wudhumo wa mufumeli khu talo nya vathu, aholu gumbana vathu, gwa gu thesa mufumeli.

²⁹Muthu nya litimiselo a na ni mapimo, aholu uye nya gihafane a gu vbiredzela gu yeyedza wupumbu waye.

³⁰Monyo nya gurule wa gu vbanyisa givili, aholu lidiwo, madwali nya guhinise sikongolo.

³¹Uye a tshanisago gisiwana, a gu vala Muvangi waye, aholu uye a sayisago gwadi gisiwana a gu zundza Nungungulu.

³²Muthu nya guvivbedwe khu monyo, a na theswa khu mithumo yaye, aholu muthu nya gululame ambari na gu fude a na ni gitumbo.

³³Guti gomo monyoni gwa muthu nya mapimo, aholu maalakanyo ya sipumbu, ma gu dzi wonegisa.

³⁴Gululama gwa gu khusedza mayigo, aholu sihoso givalo ni ga levbini litigo.

³⁵Githumi nya mapimo gi ngu zundzega ga mufumeli waye, aholu likhulo laye la gu thegela ga wule a thumago silo nya dzitshoni.