Read gitonga Mavingu 15 Bible Online

Mavingu 15 - gitonga bible

Mavingu 15

¹Phindrulo nya gu dzi nogise, yi ngu vbodzisa likhulo, aholu magana nya gupaye, ma gu wusa likhulo.

²Lidimi la va nya gugengela la gu mburisa guti, gasi magana ya va nya guvivbedwa khu monyo, ma gu gamba wupumbu.

³Maho ya PFHUMU Nungungulu momo malangani yatshavbo, a khedza va nya guvivbedwa khu monyo ni va nya gululama.

⁴Malito nya gutsakise, simbo nya womi, aholu ayo nya gukhunguvanyse, ma gu vbedza tshivba hefemulo.

⁵Gipumbu kha gi khathali khu sihevbudzo sa babe waye, gasi uye a dzumelago gu kawukwa, muthu nya mapimo.

⁶Ndrangani gwa muthu nya gululame, yomo thomba nya yingi, aholu tshatshazelo wa va nya guvivbedwa khu myonyo khu sikhunguvanyiso.

⁷Khu maganani nya vathu nya gugengele, gu duga guti, gasi myonyo nya sipumbu kha yi giri kharato.

⁸Phaso wa vathu nya guvivbedwe khu monyo, manyala ga PFHUMU Nungungulu, aholu nombelo wa vathu nya gululame, khuwo wu mu tsakisago.

⁹Ndzila ya muthu nya guvivbedwe khu monyo, manyala ga PFHUMU Nungungulu, kholu uye a gu gola uye a gimbilago khu ndzila nya gululame.

¹⁰A ngu tsayisa khu tshivba uye a ndreyago ndzilani nya gululame, ni uye a bombago gu kawukwa, a nafa.

¹¹PFHUMU Nungungulu a ngu wona ambari ni iso si guromo vbavbatshi phalani nya guete nya lithowo, a nga padwa khu ginani gu wona iso si guromo myonyoni nya vathu!

¹²Muhembululi kha goli wule a mu kawukago, ambari gu hidzimela gunene ga vathu nya gugengele.

¹³Monyo wu tengidego, wa gu mburisa khovbe, gasi wa gu bani wu vbisega, hefemulo wa gu vbela tshivba.

¹⁴Monyo wa muthu nya mapimo, wa guvbweta guti, aholu khu kanani ga muthu nya gipumbu, gu duga mapongowongo.

¹⁵Uye a guromo gutshanisekani, matshigu yatshavbo a gu ma wona na ma vivbide, aholu monyo wu tengidego, matshigu yatshavbo khya buzo.

¹⁶I tshukwana gu mana sidugwana nu gu ninga githawo PFHUMU Nungungulu, guvbindra gu mana thomba nya yingi, nuri ni sigaradzo.

¹⁷I tshukwana gu hodza mathapha avbo li gu romo lihaladzo, guvbindra gu hodza nyama nya mombe nya gunone vbakari nya mayunga.

¹⁸Muthu nya gihafane a gu wusa mayunga, gasi uye nya gutimisele a gu avbula mayunga.

¹⁹Ndzila nya ngara ya gu fanana ni libhiyo nya miba, gasi ndzila nya muthu nya gululame yi agide.

²⁰Gyanana nya mapimo gya gu tsakisa nyehe waye, gasi igyo nyambana mapimo, gya gu thela dzitshoni mayi waye.

²¹Mapongowongo ma gu tsakisa sipumbu, gasi muthu nya mapimo a gu khedza umo a hongolago.

²²Avbo wu gu mwalo wusingalagadzi, makungo ma gu bwelela hwane, aholu avbo gu guromo madhota nya mangi, makungo ma gu duga gwadi.

²³Muthu a gu tsaka khu gu ninga phindrulo nya yadi, mahungu ma gu ganedwa khidzo gu vbwetegago khidzo, ma gu tshamba ngudzu.

²⁴Ndzila nya womi ya gu hetedza muthu nya gugengele, gasi a si releli phalani nya vafi.

²⁵PFHUMU Nungungulu a ngu pfhungumula nyumba ya va nya matshandza; aholu a vhikela thomba ya noni.

²⁶Makungo ya vathu nya guvivbedwe khu myonyo, ma nyenyezide mbeli ga PFHUMU Nungungulu, aholu Uye a gu tsakiswa khu magana nya vathu va agidego.

²⁷Muthu nya makolo a gu thela libango ndrangani gwaye, gasi uye a gumba dzumela gu rengeledwa, a na vbanya.

²⁸Muthu nya gululame a gu phela khu gu pimisa, khavbo a ningago phindrulo, aholu, khu kanani ga va nya guvivbedwa khu myonyo, gu duga mapongowongo nya gutale.

²⁹PFHUMU Nungungulu kha hidzimeli vbafuvbi ga va nya guvivbedwa khu monyo, aholu a na yingisa milombelo ya va nya gululama.

³⁰Iso si tsakedwago khu maho, sa gu tsakisa monyo, ni mahungu nya yadi, ma gu tiyisa marambo.

³¹Uye a dzumelago sileletelo nya guvbanyise, a na vbanya gumogo ni vathu nya gugengele.

³²Uye a si dzumeligo gu kawukwa, a gu dzi nyenya uye mune wurumba; aholu uye a dzumelago gu laywa, a gu mana wugengeli.

³³Guthava PFHUMU Nungungulu gihevbudzo nya guti, gu dzi nogisa gu gomo wuzundzo.